Dubay (Birlashgan Arab Amirliklari)da Xalqaro elektraloqa ittifoqining (XEI) 2023-yilgi Butunjahon radioaloqa konferensiyasi (BRK-23) o‘z ishini boshladi. Konferensiyada XEIga a’zo 193 mamlakatdan 3 500 dan ortiq ishtirokchilar, shuningdek, xalqaro tashkilotlar, uskunalar ishlab chiqaruvchilar, tarmoq operatorlari va IT-sanoat vakillar qatnashmoqda.

Nufuzli xalqaro anjumanda O‘zbekiston delegatsiyasi — Raqamli texnologiyalar vazirligi, “Elektromagnit moslashuv markazi” DUK va “UNICON.UZ” MChJ vakillari ham ishtirok etishmoqda.

Har uch-to‘rt yilda bir marta o‘tkaziladigan Butunjahon radioaloqa konferensiyasi radiochastota spektri va yo‘ldoshli orbitalardan foydalanishni tartibga soluvchi xalqaro shartnoma — XEI Radioaloqa reglamentini qayta ko‘rib chiqish vakolatiga ega.

BRK-23da raqamli iqtisodiyotda muhim rol o‘ynovchi, elektraloqa (telekommunikatsiyalar) va AKT sohasiga katta ta’sir ko‘rsatadigan bir qator ilg‘or texnologik innovatsiyalarga qo‘yiladigan talablar ko‘rib chiqiladi.

Butunjahon radioaloqa konferensiyasining 20-noyabr kuni bo‘lib o‘tgan birinchi yalpi majlisida turli funksional vazifalarga ega 7 ta qo‘mitadan iborat BRK-23 tuzilmasi belgilangan edi. Aloqa sohasidagi hududiy hamdo‘stlik (ASHH) tomonidan O‘zbekistondan ko‘rsatilgan delegatlar ham qo‘mitalar rahbariyatiga saylangan edi.

BRK-23ga tayyorgarlik doirasida O‘zbekistonda radioaloqa texnologiyalari uchun radiochastota spektrini taqsimlash bo‘yicha kun tartibidagi masalalar bo‘yicha respublika pozitsiyasini shakllantirish bo‘yicha oldingi — BRK-19dan keyin to‘rt yillik rejali ishlar amalga oshirildi.

Konferensiya 2023-yilning 15-dekabriga qadar davom etadi. Uning natijalari insonlar va davlatlar hayotining ajralmas qismiga aylangan dunyodagi radioaloqa texnologiyalarining hozirgi va kelajakdagi rivojlanishiga sezilarli ta’sir ko‘rsatadi.