АКТ вазири қўшимча таътил вақтини фойдалироқ ўтказиш бўйича ўз фикрларини билдирди.

«Бўш вақтингизда фақат ўз устингизда ишлашга ҳаракат қилсангиз, муваффақиятга эришишингиз аниқ!

Янги йил арафасида кўпчилик кўп нарсаларни ният қилади, кейинчалик эса ўша ниятларини амалга ошириш бўйича аниқ режа ва ҳаракат бўлмаганидан кейин уларнинг секин-аста армонга айланиб бориш хавфи бор...

Президентимизнинг янги йилдаги илк ташрифларида ёшлар билан учрашувда айтган гаплари, нафақат Темурбеклар мактабидаги ёшларга, балки барча ёшларимизга тааллуқлидир. Шунинг учун бу гапларни барча ёшларимиз яна бир бор диққат билан эшитиб, бугундан бошлаб қўйган мақсадлари сари қаттиқ ҳаракат қилишлари ўзлари учун фақат фойда келтиради.

Акс ҳолда, йиллар ўтаверади, ниятлар саробга айланаверади ва охир-оқибат кўпчилик муваффақиятга эришмаганларга ўхшаб, ўзининг ҳаётидаги муваффақиятсизлигида ўзидан бошқа ҳаммани айблаш билан овора бўлиб қолиш хавфи пайдо бўлади (масалан: ота-онам буни қилиб бермаган, ўқитувчим яхши эътибор қилмаган, бошлиғим ёрдам бермаган, ану қариндошим ёрдам бермаган, давлат ёмон ва ҳ.к...). Лекин бу билан ўзининг ҳаёти яхши бўлиб қолмаслиги аниқ.

Шу сабабли, келинглар қўшимча таътил вақтини ҳам ўзимиз учун фойдалироқ қилиб ўтказайлик. Интернетда бекорга вақт сарфлашнинг ўрнига, чет тилларини текинга ўргатадиган «duolingo.com»дан ва дастурлашни текинга ўргатадиган «code.org» ёки «uzbekcoders.uz»дан кўпроқ фойдаланинглар.

Агар текинга ўзингиз ўрганишга зериксангиз ва пулини тўлаб гуруҳ бўлиб ўрганмоқчи бўлсангиз, IT-Park ҳудудий марказларида ёки унинг таълим хизматларини кўрсатадиган резидентларига бориб малакангизни оширинг. Уларнинг тўлиқ рўйхати: https://education.it-park.uz/uz/

Бу эса бўш вақтингизни келажак учун энг яхши сармояга айлантириш демакдир! Агар ўз она тилингизга қўшимча чет тилларида равон сўзлаша олсангиз ҳамда ахборот технологияларининг турли соҳалари бўйича мутахассис бўлсангиз, келажакда қайси соҳада ёки қайси ҳудудда ишлашингиздан қатъи назар, муваффақиятга эришиш имкониятингиз албатта юқорироқ бўлади», – дея таъкидлади АКТ вазири.

Эслатиб ўтамиз, Президент Шавкат Мирзиёев ёшларга оид давлат сиёсатини амалга ошириш, ёш авлодни ҳарбий-ватанпарварлик руҳида тарбиялаш, давлат хавфсизлиги соҳасида кадрлар тайёрлаш борасида амалга оширилаётган ишлар билан танишиш мақсадида Давлат хавфсизлик хизматининг «Темурбеклар мактаби» ҳарбий-академик лицейи ва ДХХ Академиясига ташриф буюрганди.