Хизматлар экспортини ривожлантириш бўйича директор Маҳлиё Муксинова “Qodeca” компаниясининг молиявий директори ва операцион директори Малгожата Влодарская билан музокаралар олиб борди.

“Qodeca” вакиллари “Zero Risk” дастурига қизиқиш билдирдилар. Учрашув давомида томонлар бир қатор техник ва ҳуқуқий масалаларни муҳокама қилдилар.

IT Park вакиллари “Zero Risk” дастурининг афзалликлари ва IT Park Uzbekistan резидентлари учун солиқ имтиёзлари ҳақида батафсил маълумот беришди.

IT Park Uzbekistanда бизнес ва университетлар учун таълим дастурларини ишлаб чиқишга ихтисослашган “Fireflies” компанияси вакиллари билан учрашув бўлиб ўтди.

Учрашувда “Fireflies” ҳаммуассиси Михал Новаковский, шунингдек, IT Park Uzbekistan вакиллари — хизматлар экспортини ривожлантириш департаменти раҳбари Жаҳонгир Кагиров ҳамда Европа Иттифоқи ва Буюк Британия бозорлари бўйича етакчи мутахассис Холид Ал Жаҳми иштирок этди.

“Fireflies” асосчиси Михал Новаковский Марказий Осиё бозорига чиқиш стратегиясини тақдим этди ва Ўзбекистонда минтақавий офис ташкил этишдан манфаатдорлигини таъкидлади.

Компания фаолиятининг асосий йўналиши хорижий компанияларга махсус тренинглар ва менторлик дастурлари орқали маданий тўсиқларни енгиб ўтишда ёрдам беришдир. 

Учрашув доирасида минтақада фаолият юритаётган Европа компанияларига шу каби хизматларни кўрсатиш имкониятлари муҳокама қилинди.

Томонлар таълим хизматлари экспорти соҳасидаги ҳамкорлик истиқболлари ва ўзаро алоқаларнинг потенциал шаклларини кўриб чиқдилар.

IT Park Uzbekistan етакчи халқаро IТ компанияларни фаол жалб қилиб, уларнинг барқарор ўсиши ва маҳаллий экотизимга интеграциялашуви учун шароит яратмоқда.