Мамлакатимиз IТ салоҳиятини хорижий компаниялар ва инвесторларга намойиш этиш ва ёшларимиз учун янада кўпроқ янги иш ўринларини яратиш мақсадида юртимизда “Оffshore Оutsorcing Тоur” бўлиб ўтмоқда.

“Рақамли Ўзбекистон – 2030” миллий стратегиясидан келиб чиқиб, 2030 йилгача 5 миллиард долларлик IТ хизматларни экспорт қилишга эришиш учун IT Park резидентлари ва вакиллари мунтазам равишда йирик халқаро IТ тадбирларда фаол иштирок этиб, хорижий компаниялар билан учрашувлар ва ташрифлар уюштирди.

Ўзбекистоннинг глобал бизнес юритиш учун асосий афзалликларидан бири – бу аввало малакали кадрларнинг кўплингир. 36 миллионлик аҳолининг қарийб учдан икки қисмини 30 ёшгача бўлган ёшлар ташкил этса, уларнинг қарийб 5 миллиондан ортиғи инглиз тилида гаплашади.

Шунингдек, хорижий инвесторлар, резидент компаниялар таъсисчилари ва IТ-мутахассислар маҳаллий тиббий хизматлар, таълим ва кўчмас мулк сотиб олиш имкониятига эга бўлган ҳолда 3 йилгача муддатга кўп марталик виза олишлари мумкин.

Ташриф буюрган хорижий компания вакиллари ҳам кўплаб қўллаб-қувватлаш дастурлари ҳамда турли солиқ имтиёзлари туфайли Ўзбекистонда бизнес юритиш ниҳоятда қулай, эканлигини таъкидлашмоқда. Айниқса, “One Stop Shop” хизмати туфайли Ўзбекистонда компания очиб тўлиқ ишга тушиб кетиши учун бор-йўғи 6-8 ҳафта вақт кетади.

150 дан зиёд хорижий компания вакилларини бир жойда жамлаган тадбирнинг биринчи кунини Ўзбекистон Рақамли технологиялар вазири Шерзод Шерматов ўз нутқи билан очиб берди.

Шундан сўнг иккита панел муҳокамаси бўлиб ўтди. Биринчиси, таълим соҳасидаги истеъдодларни шакллантириш ва инновациялар масалаларига бағишланган бўлса, иккинчисида эса мамлакатимиздаги ITES бизнесининг ўзига хос жиҳатлари ва йўналишлари тавсифлаган ҳолда, Ўзбекистондаги аутсорсинг экотизими намойиш этилди.

Ўзбекистон Рақамли технологиялар вазирлиги ва IT Park Uzbekistan томонидан ташкил этилган “Оffshore Оutsorsing Тоur” тадбирлари 19-20 март кунлари ҳам Тошкент ва Самарқанд шаҳарларида давом этади.

19 март куни Самарқанд шаҳрида Ўзбекистон IТ-аутсорсинг бозорини ўрганиш бўйича давра суҳбати бўлиб ўтиши кутилмоқда.

Тадбирнинг якуний куни эса Самарқанд шаҳридаги маданий дастур, жумладан, Шоҳи Зинда ва Регистон каби тарихий диққатга сазовор жойларга ташкил қилинадиган ташрифларга бағишланади.

“Оffshore Оutsorsing Тоur” халқаро компанияларга Ўзбекистонга сармоя киритиш ва ўз бизнес ташаббуслари учун маҳаллий ресурслардан фойдаланишнинг афзалликлари билан танишиш учун ноёб имкониятни тақдим этиш баробарида, мамлакатимизда ахборот технологиялари соҳасида янги иш ўринлари яратилишига ва иқтисодиётнинг тараққий топишига хизмат қилади, десак муболаға бўлмайди.