Бугун, 2 ноябрь куни “Ўзбектелеком” АКда 100га яқин инвесторлар билан учрашув бўлиб ўтди. “Тошкент” Республика фонд биржаси платформасида ташкил қилинадиган компания IPOси ва “Ўзбектелеком” АК фаолиятини такомиллаштиришнинг асосий жиҳатларига бағишланган ушбу учрашув доирасида потенциал инвесторлар билан бизнес-нонушта ташкил этилди.

Аввалроқ, “ICTWEEK UZBEKISTAN 2023” кўргазмасида “Ўзбектелеком” АК IPO орқали жойлаштириладиган, умумий сони 5 542 046 дона қўшимча акциялар чиқарилишини рўйхатдан ўтказган эди. IPOни муваффақиятли жойлаштириш учун “Ўзбектелеком” АК Ўзбекистон Ташқи иқтисодий алоқалар миллий банки, “Ўзсаноатқурилишбанк” АТБ ва “Portfolio Investments” инвестиция компаниясидан иборат андеррайтерлар консорциуми билан фаол ҳамкорлик қилмоқда. Имзолаш кампаниясини жорий йил охиригача якунлаш режалаштирилган, “Ўзбектелеком” АК IPO доирасида жами 33 миллиарддан 55 миллиард сўмгача маблағ жалб қилишни режа қилган бўлиб, ушбу инвестиция маблағлари компания фаолиятини янада ривожлантиришга йўналтирилади.

“Ўзбектелеком” АК рақамлаштириш бўйича лидер сифатида Jett инвестиция сервиси билан ҳамкорликда биринчилардан бўлиб MyUZTELECOM мобил иловаси орқали компания акцияларини онлайн харид қилиш имкониятини республика бўйлаб кенг аҳоли қатлами учун жорий этди, бунда брокерлик ҳисоб-рақамлари IPO андеррайтери “Portfolio Investments”да очилади. IPO орқали акцияларни харид қилиш учун MyUZTELECOM иловасида масофадан туриб брокерлик ҳисоб-рақамини очиш ва IPOда онлайн ариза топшириш кифоя.

Анжуман якунида Q&A сессияси ташкил этилиб, инвестор ва соҳа вакиллари ўзларини қизиқтирган саволларга жавоб олишди.