Video o‘yinlar sanoati uchun yetakchi global biznes yechimlar ta’minotchisi “Xsolla” “Global Business Services Forum” doirasida bo‘lib o‘tgan uchrashuvdan so‘ng O‘zbekiston GameDev  bozori bilan hamkorlik imkoniyatlarini o‘rganishga kirishdi. Abdulahad Kuchkarov boshchiligidagi IT Park Uzbekistan  vakillari bilan bo‘lgan uchrashuvda mahalliy iste’dodlarni o‘qitish va mintaqaning rivojlanayotgan o‘yin sanoatini qo‘llab-quvvatlash maqsadida O‘zbekistonda O‘yin ishlab chiqarish akademiyasini tashkil etish imkoniyati muhokama qilindi.

Uchrashuvda “Xsolla” kompaniyasining Global strategik hamkorlik va davlat organlari bilan o‘zaro aloqalar bo‘limi rahbari Ritis Jozef Yan hamda Sharqiy Yevropa va Markaziy Osiyoda biznesni rivojlantirish bo‘yicha katta vitse-prezident Anatoliy Strutinskiy ishtirok etdilar.

2005-yilda asos solingan va bosh qarorgohi Kaliforniyaning Sherman-Ouks shahrida joylashgan “Xsolla” turli platformalarda o‘yinlarni moliyalashtirish, ishga tushirish va monetizatsiya qilish uchun ishlab chiquvchilar va nashriyotchilarga vositalar taqdim etish orqali video o‘yinlar sanoatining asosiy ishtirokchisiga aylandi. Kompaniyaning yillik daromadi 100 million dollardan oshadi va xodimlar soni butun dunyo bo‘ylab 490 dan ortiq mutaxassisni tashkil etadi.

O‘zbekistonning jadal rivojlanayotgan IT-sektori va malakali mutaxassislarning mavjudligini inobatga olgan holda, “Xsolla” o‘zining global faoliyatini qo‘llab-quvvatlash uchun mamlakat imkoniyatlaridan foydalanishga qiziqish bildirdi. Kompaniya, shuningdek, O‘zbekiston bozoriga kirishni osonlashtirishi mumkin bo‘lgan turli xil davlat qo‘llab-quvvatlash dasturlarini, jumladan xorijiy investitsiyalarni rag‘batlantirishga qaratilgan “Zero Risk” tashabbuslarini ko‘rib chiqmoqda. O‘zbekistonda akademiyaning ochilishi mahalliy iqtisodiyotga sezilarli foyda keltirishi, ish o‘rinlarini yaratishi va mamlakatdagi IT-mutaxassislarining malaka darajasini oshirishi mumkin.

Muzokaralar davomida tomonlar hamkorlikni rasmiylashtirish va kelajakdagi istiqbollarni o‘rganish maqsadida o‘zaro anglashuv memorandumini (MoU) imzolashga kelishib oldilar.

Mahalliy iste’dodlarni o‘qitish va ishga joylashtirish orqali “Xsolla” butun dunyo bo‘ylab o‘yin ishlab chiqaruvchilarni qo‘llab-quvvatlash bo‘yicha o‘z vazifasini davom ettirish niyatida, shu bilan birga O‘zbekistonning jadal rivojlanayotgan texnologiya sanoatiga hissa qo‘shishni maqsad qilgan.