Aziz maktab bitiruvchilari, kelgusi faoliyatingizda nafaqat o‘zingiz va yaqinlaringizni, balki atrofingizdagi ko‘proq insonlarning hayotini yaxshilashga harakat qiling. Buning uchun imkoni boricha yaxshiroq ta’lim olish va tajriba orttirishdan to‘xtamang.

Albatta, siz dunyoning eng nufuzli universitetilaridan birini bitirib kelganingizdan keyin xalqaro tashkilotda yoki kompaniyada ishlagandek daromadingiz yoki bo‘lmasa o‘zingiz va oilangiz uchun qo‘shimcha vaqtingiz yetarli bo‘lmas, lekin aynan davlat xizmatchisi sifatida ko‘proq insonlar hayotida ijobiy o‘zgarishlarga sabab bo‘layotganingiz hissini tuyish ham o‘ziga xos motivatsiya bag‘ishlaydi.

Davlat xizmatchisi degan sharafli kasbni aynan shu maqsadda tanlashingiz to‘g‘ri bo‘ladi. Faqatgina yuqori maqsad qo‘yib ishlaydigan, yaxshi bilimli, halol va tajribali davlat xizmatchilari bilan mamlakatimizni dunyoda raqobatbardosh iqtisodiy rivojlangan davlatlar qatoriga olib chiqishga erishishimiz mumkin! Hech kim tashqaridan kelib biz uchun yurtimizni o‘zgartirib bermaydi...

O‘zbekistonning kelajagi SIZ!