Шундай инсонлар борки, ҳаётга муҳаббати, яшашга иштиёқи баланд, улар ҳаётнинг мураккаб вазиятларига оқилона баҳо бериб, ўзгаларга яхши намуна бўла оладилар. Бошга тушган синовлар уларнинг кўнглини чўктирмайди, балки куч беради, яна минглаб одамларни ҳам олға интилишга илҳомлантиради. Уларда ҳолатга мослашиш деган тушунча йўқ, аксинча замонавий соҳалар билан ўзлари учун қулай шароит яратиб олаверадилар.

Ана шундай кишилардан бири Дилшод Нормуродов бугун IT соҳасида фаолият юритиб, юртимиз равнақига ўз ҳиссасини қўшиб келмоқда…

– Болалалик йилларим...

– Ёшлигимда уй синфда ўқиганман. Уялuш ҳисcи сабаб деярли уйдан кўчага чиқмасдим. Кейинчалик университетда ўқиётган йилларим дўстлар орттириб, бу ҳисни аста-секин енгганман.

– Менинг ташхисим...

– Касаллигим аслида орттирилган. Фан тилида полиомиелит, халқ орасида эса шол дейилади. Кўпчилик бу юқумли касаллик дейди, аммо менда айнан нима сабаб пайдо бўлганини аниқ билмайман. Ота-онам 10 ойлигимда менда касаллик аломатларини сезиб қолишгач, 25 ёшимгача даволатишган. Ҳозирда протезда ҳаракатланаман.

– Болаликдан қизиққан соҳам...

– Биласизми, болаликдан уйдагилар ногиронлар учун ўтириб ишлашга қулай бўлган соҳа – бухгалтерлик (ҳисобчиликка) йўналтиришган. Шу боис ҳам келажакда ҳисобчи бўламан деган мақсад билан 19 ёшимда Тошкент ахборот технологиялари университетининг бухгалтерия йўналишига ўқишга кирганман. Шу соҳа бўйича 4 йил бакалавр, 2 йил магистратура йўналишларида таҳсил олганман. Бу орада грант асосида Японияга ҳам бориб келганман.

– АйТи ва мен...

– Талабалик йилларим бизга иқтисод соҳаси билан параллел равишда дастурлаш ҳам ўтилар эди. Аммо ўқишни тамомлагач, у вақтлар прописка масаласи сабаб мени ҳеч қаерга ишга олишмаган. Маълум бир вақт ижтимоий йўналишда фаолият юритганимдан сўнг IТ соҳасини янада яхшироқ ўрганиб, ҳаётимни шу соҳа билан боғлашга қарор қилдим. Дастурлашни яхшироқ ўзлаштириб олиб, мана ҳозирги кунга қадар шуғулланиб келяпман.

– IТ соҳаси ҳамма учун!

– IТ соҳаси нафақат ногиронлар учун, балки ёшидан ва жинсидан қатъий назар, ҳамма учун кенг имкониятларга эга. Ижтимоий ҳаётдаги барча соҳа вакиллари ўзлари учун бу соҳани ўрганиб қўйишса зиён қилмайди. Сабаби, бундан кейинг ҳаёт фақат IТ йўналиши билан боғлиқ бўлади.

Ҳозирги кунда ҳамманинг қўлида телефон. Аммо ундан фойдаланишнинг ҳам ўзига яраша қонун-қоидалари бор. Кўпчилик билиб-билмасдан бугунги кунда хакерлар хужумига учраб қолишмоқда. Мана шундай вазиятларнинг олдини олиш, қолаверса турли хизматлардан онлайн фойдалана олиш учун ҳам ахборот технологияларини яхши ўзлаштириш лозим.

– Ҳеч қачон таслим бўлмаслик керак!

– Ҳаётда инсоннинг энг катта душмани – бу ўзи! Чунки атрофдагилар ҳам сен қила олмайсан, уддалай олмайсан деган тақдирда ҳам одам ўзи “эплайман”, деган тушунча билан ҳаракат қилса, шунда истаган мақсадига эриша олади. Шахсан ўзим имконияти чекланган ёшларга айтадиган гапим – ҳеч қачон таслим бўлмаслик керак!

Таслим бўлган киши ўлик ҳисобланади. Билим олишдан, изланишдан, ўз устида ишлашдан тўхтаган инсоннинг жамиятда ҳам ўрни қолмайди. Шуни унутмаслик керакки, одамзод жисмоний меҳнатдан кўра, ақлий салоҳияти орқали ҳаётда кўп нарсага эришиши мумкин.

Кўрсатувнинг тўлиқ қисмини Xabar.uz ахборот-таҳлилий порталининг YouTube канали орқали томоша қилинг!

Эъзоза Турғунова суҳбатлашди