O‘zbekiston BMTning Elektron hukumatni rivojlantirish indeksining 2022-yilgi reytingida, o‘tgan davr natijasidan 18 pog‘ona yuqorilab, 195 ta mamlakat ichida 69-o‘ringa ko‘tarilib, eng tez sur’atlarda o‘sayotgan davlatlar qatoriga kirgan edi.

Ushbu xalqaro reyting ko‘rsatkichlari asosida O‘zbekistondagi davlat va xo‘jalik hamda mahalliy ijro etuvchi hokimiyat organlarida (keying o‘rinlarda — davlat tashkilotlari) raqamli transformatsiya holatini reyting baholash metodikasi ishlab chiqilgan bo‘lib, mazkur metodika doimiy ravishda takomillashtirib borilmoqda.

Raqamli hukumat loyihalarini boshqarish markazi 2023-yil I yarim yillik yakuni bo‘yicha davlat tashkilotlarining raqamli transformatsiya holati reytingini e’lon qildi. Reytingda 43 ta davlat organi, 38 ta xo‘jalik organi va 14 ta mahalliy hokimlik: jami 95 ta davlat tashkiloti qamrab olindi.

Reyting baholash 5 ta yo‘nalishda amalga oshirildi:

• Ochiqlik va elektron ishtirok;
• Elektron davlat xizmatlari;
• Axborot xavfsizligi;
• Faoliyatning raqamlashtirilganligi;
• Tashkiliy masalalar.

Reyting natijalari quyidagi tartibda 3 ta toifaga ajratiladi:

• 71 dan 100 ballgacha — “yashil” (yaxshi);
• 55 dan 71 ballgacha — “sariq” (qoniqarli);
• 55 dan pasti — “qizil” (qoniqarsiz).

Baholash natijalariga ko‘ra:

• Yaxshi — “yashil” ro‘yxatga jami 38 ta;
• Qoniqarli — “sariq” ro‘yxatga jami 41 ta;
• Qoniqarsiz — “qizil” ro‘yxatga jami 17 ta tashkilot kirdi.