Malayziyaning Kuala-Lumpur shahrida o‘tkazilayotgan “QS Higher Education Summit Asia Pacific 2023” sammiti doirasida QS reyting tashkiloti Osiyo universitetlarining 2024-yil uchun reyting (QS Asia University Rankings 2024) natijalarini e’lon qildi.

Unga ko‘ra, mamlakatimizning 6 ta hududidan 14 ta oliy ta’lim muassasasi TOP-1000 talikdagi Osiyoning eng yaxshi universitetlari ro‘yxatiga kiritildi. Ular orasida Toshkent axborot texnologiyalari universiteti (651–700) ham bor.

Joriy yilda xalqaro tan olinganlik darajasi, ilmiy-tadqiqotlar rivoji, ta’lim sifati, xalqaro hamkorlik, akademik mobillik sohalari bo‘yicha Osiyo oliygohlari reytingida 25 ta davlatdan 856 ta (148 ta ilk marta) oliygoh ishtirok etdi.

Bunda O‘zbekistondagi 3 ta OTM — O‘zbekiston milliy universiteti (O‘zMU), “Toshkent irrigatsiya va qishloq xo‘jaligini mexanizatsiyalash muhandislari instituti“ milliy tadqiqot universiteti (“TIQXMMI“ MTU), Toshkent davlat iqtisodiyot universiteti (TDIU) “Akademik reputatsiya” indikatori bo‘yicha TOP-200 oliygohlar qatoridan o‘rin egalladi. O‘zMU “Akademik reputatsiya” bo‘yicha nisbatan yetakchi bo‘lib, 135-o‘rinda qayd etildi. Mazkur indikator bo‘yicha 7 ta OTM o‘z o‘rnini yaxshilashga erishgan. “TIQXMMI“ MTU “Ish beruvchilar o‘rtasidagi reputatsiya” indikatori bo‘yicha 208-o‘rinni, “Professor-o‘qituvchilar va talabalar nisbati” indikatori bo‘yicha 124-o‘rinni egalladi.

Xalqaro reytinglarda ilmiy-tadqiqotlar rivoji respublika OTMlarining egallagan o‘rnini yaxshilashda asosiy imkoniyatlaridan biri bo‘lib qolmoqda. “TIQXMMI“ MTU respublikada “ilm-metrik“ ko‘rsatkichlar, jumladan, bitta maqolaga nisbatan iqtiboslar soni bilan o‘lchanuvchi ilmiy ishlarning ta’sir doirasi (mazkur ko‘rsatkich bo‘yicha Osiyo oliygohlari orasida 768-o‘rin) va bir nafar professor-o‘qituvchiga to‘g‘ri keluvchi ilmiy maqolalar soni bilan o‘lchanuvchi ilmiy-tadqiqot samaradorligi (mazkur ko‘rsatkich bo‘yicha Osiyo oliygohlari orasida 615-o‘rin) bo‘yicha yetakchi sifatida qayd qilindi.

O‘zMU respublikada xalqaro ilmiy kollaboratsiyalar bilan hamkorlik bo‘yicha nisbatan faol OTM sifatida qayd qilingan bo‘lib, “Xalqaro ilmiy kollaboratsiyalar indeksi” indikatori bo‘yicha 578-o‘rinni egalladi. Shuningdek, “TIQXMMI“ MTU “Ilmiy darajaga ega bo‘lgan professor-o‘qituvchilar ulushi” indikatori bo‘yicha respublika OTMlari orasida yetakchi bo‘lib, 376-o‘rinni egalladi. O‘zMU “Xorijiy professor-o‘qituvchilar ulushi” bo‘yicha mintaqaviy reytingda yuqori natijani qayd qilgan bo‘lsa (90-o‘rin), TDIU “Xorijiy talabalar ulushi” bo‘yicha mintaqaviy reytingda 130-o‘rinda qayd qilindi.