AKT vaziri qo‘shimcha ta’til vaqtini foydaliroq o‘tkazish bo‘yicha o‘z fikrlarini bildirdi.

«Bo‘sh vaqtingizda faqat o‘z ustingizda ishlashga harakat qilsangiz, muvaffaqiyatga erishishingiz aniq!

Yangi yil arafasida ko‘pchilik ko‘p narsalarni niyat qiladi, keyinchalik esa o‘sha niyatlarini amalga oshirish bo‘yicha aniq reja va harakat bo‘lmaganidan keyin ularning sekin-asta armonga aylanib borish xavfi bor...

Prezidentimizning yangi yildagi ilk tashriflarida yoshlar bilan uchrashuvda aytgan gaplari, nafaqat Temurbeklar maktabidagi yoshlarga, balki barcha yoshlarimizga taalluqlidir. Shuning uchun bu gaplarni barcha yoshlarimiz yana bir bor diqqat bilan eshitib, bugundan boshlab qo‘ygan maqsadlari sari qattiq harakat qilishlari o‘zlari uchun faqat foyda keltiradi.

Aks holda, yillar o‘taveradi, niyatlar sarobga aylanaveradi va oxir-oqibat ko‘pchilik muvaffaqiyatga erishmaganlarga o‘xshab, o‘zining hayotidagi muvaffaqiyatsizligida o‘zidan boshqa hammani ayblash bilan ovora bo‘lib qolish xavfi paydo bo‘ladi (masalan: ota-onam buni qilib bermagan, o‘qituvchim yaxshi e’tibor qilmagan, boshlig‘im yordam bermagan, anu qarindoshim yordam bermagan, davlat yomon va h.k...). Lekin bu bilan o‘zining hayoti yaxshi bo‘lib qolmasligi aniq.

Shu sababli, kelinglar qo‘shimcha ta’til vaqtini ham o‘zimiz uchun foydaliroq qilib o‘tkazaylik. Internetda bekorga vaqt sarflashning o‘rniga, chet tillarini tekinga o‘rgatadigan «duolingo.com»dan va dasturlashni tekinga o‘rgatadigan «code.org» yoki «uzbekcoders.uz»dan ko‘proq foydalaninglar.

Agar tekinga o‘zingiz o‘rganishga zeriksangiz va pulini to‘lab guruh bo‘lib o‘rganmoqchi bo‘lsangiz, IT-Park hududiy markazlarida yoki uning ta’lim xizmatlarini ko‘rsatadigan rezidentlariga borib malakangizni oshiring. Ularning to‘liq ro‘yxati: https://education.it-park.uz/uz/

Bu esa bo‘sh vaqtingizni kelajak uchun eng yaxshi sarmoyaga aylantirish demakdir! Agar o‘z ona tilingizga qo‘shimcha chet tillarida ravon so‘zlasha olsangiz hamda axborot texnologiyalarining turli sohalari bo‘yicha mutaxassis bo‘lsangiz, kelajakda qaysi sohada yoki qaysi hududda ishlashingizdan qat’i nazar, muvaffaqiyatga erishish imkoniyatingiz albatta yuqoriroq bo‘ladi», – deya ta’kidladi AKT vaziri.

Eslatib o‘tamiz, Prezident Shavkat Mirziyoyev yoshlarga oid davlat siyosatini amalga oshirish, yosh avlodni harbiy-vatanparvarlik ruhida tarbiyalash, davlat xavfsizligi sohasida kadrlar tayyorlash borasida amalga oshirilayotgan ishlar bilan tanishish maqsadida Davlat xavfsizlik xizmatining «Temurbeklar maktabi» harbiy-akademik litseyi va DXX Akademiyasiga tashrif buyurgandi.