Академик М.Ф.Решетнев номидаги Сибир давлат фан ва технология университети матбуот хизмати университет мутахассислари талабаларнинг кадрлар салоҳиятини баҳоловчи сунъий интеллект (СИ) асосида дастур ишлаб чиққанини маълум қилди. Бу абитуриентларга университетда тўғри ўқиш йўналишини танлашда ёрдам беради.

"Приоритет-2030" дастури доирасида ишлаб чиқилган дастурда етти йил давомида тўпланган 35 минг талаба ҳақидаги маълумотлардан фойдаланилади. Бунга университетдаги барча таълим йўналишлари киради.

Дастурнинг асосий мақсади нафақат талабанинг танланган мутахассислиги бўйича муваффақиятини башорат қилиш, балки уни ўқишдан четлаштиришга таъсир қилувчи омилларни аниқлашдир. Дастурий комплекс Ягона давлат имтиҳонлари натижалари ва абитуриентларнинг ютуқлари каби объектив маълумотларни таҳлил қилади ва талабанинг ўқишни давом эттириши ёки йўқлигини 95 фоиз аниқлик билан башорат қилади.

Дастурни ишлаб чиқиш турли фанлар бўйича мутахассислар, жумладан педагоглар, иқтисодчилар ва информатика соҳасидаги мутахассислар томонидан амалга оширилади. Натижада, лойиҳа талабалар муваффақиятига таъсир этувчи омилларни баҳолашнинг самарали моделини тақдим этиши ва университетдаги таълим жараёнини яхшилашга ёрдам бериши керак.