Кеча, 28 ноябр куни Лондонда вазирликлар вакиллари ва компанияларнинг етакчи раҳбарларини бирлаштирган 27-Ўзбекистон — Британия савдо ва саноат кенгаши (UBTIC)нинг муҳим йиғилиши бўлиб ўтди.

Тадбирда Ўзбекистон IT-соҳада амалга ошираётган тизимли ислоҳотлар ҳамда келгусидаги истиқболли режалар билан таништириб ўтилди, жумладан:

• IT-хизматлар ва дастурий маҳсулотлар экспорти ҳажмини 5 миллиард долларга етказиш;
• IT-соҳада 300 минг нафар ёшларни иш билан таъминлаш;
• БМТнинг Электрон ҳукуматни ривожлантириш индексида мамлакатимизни етакчи 30 та давлат қаторига киритиш.

Маълумот учун: 2023 йилнинг дастлабки 9 ойида Ўзбекистондаги 22 та маҳаллий резидент компания томонидан Буюк Британияга 33,5 миллион долларлик IT-хизматлар экспорти амалга оширилган бўлиб, бу жами кўрсатилган IT-хизматлар экспортининг (238,7 млн доллар) 14 фоизини ташкил этмоқда.

Мамлакатимизда Буюк Британия капиталига асосланган 11 та резидент компания фаолият олиб бормоқда.

Лондондаги музокараларда Буюк Британияга IT-хизматлар экспортини ошириш ва соҳага инвестицияларни жалб қилиш масалалари муҳокама қилинди.

Ўзбекистон делегацияси Британиядаги инвесторлар ва IT-компанияларга ушбу мазмундаги мурожаатни йўллади:

“Биз британиялик инвесторлар ва компанияларни Ўзбекистонда IT соҳаcида ҳамкорлик қилишга таклиф қиламиз.

IT соҳасида жадал суръатлар билан ўсиб бораётган Ўзбекистон бугунги кунда Марказий Осиёнинг янги IT-хаби сифатида пайдо бўлмоқда. Биз ҳамкорликка очиқлигимизни ва биргаликда IT-хизматлар экспортини ривожлантиришга тайёрлигимизни маълум қиламиз”.