АҚШнинг Калифорния штатида, “TechCrunch Disrupt 2023” халқаро конференциясида IT Park делегацияси Қозоғистон, Озарбайжон, Мўғулистон, Қирғизистон ва Тожикистон технопарклари билан бирга иштирок этди.

Минтақанинг IT-салоҳиятини ҳамкорликда намойиш этиш мақсадида “Silkroad Innovation Hub” ташкилоти ташаббус билдирди. Шунингдек, “Silkroad Innovation Hub” ташкилотининг павильонларида Марказий Осиёдан ташриф буюрган 14 та стартап, жумладан, IT Park резидентлари ҳам иштирок этди.

Мазкур тадбирнинг асосий қисми “Expo” (кўргазма) бўлиб, унда Ўзбекистон стендига қизиқиш билдирган IT соҳаси вакиллари мамлакатимизда BPO ва IT-аутсорсингни ривожлантириш бўйича ўзларини қизиқтирган саволларга жавоб олдилар, бу ерда Ўзбекистонда стартап ва венчур экотизимлари ривожланиши ҳақида маълумот берилди ҳамда “IMAN”, “Mohirdev”, “Workly” ва “MyID” каби IT Park резидентларининг стендлари намойиш этилди:

• “IMAN” — мижозларга “P2P” инвесторлари томонидан молиялаштирилган чакана сотувчилардан хоҳлаган нарсани сотиб олиш имконини берувчи шариатга мос келадиган “PoS” ечимини тақдим этди;
• “Mohirdev” — барча ёшдагилар учун дастурлашни ўрганиш учун экотизим яратмоқда. У 30 дан ортиқ маҳоратга асосланган дастурлаш курсларига эга бозорни таклиф қилди, шунингдек, ўқув марказлари ва университетларга ўзларининг дастурлаш курсларини очишга ёрдам бериш учун “CRM” ва “LMS” ечимларини яратди;
• “Workly” — бу кичик ва ўрта бизнес учун булутли технологияларга асосланган иш вақтини ҳисобга олиш ечими. Тизим ходимларга таътил сўраш, жадвал янгиланишларини олиш ва даромадларни кузатиш имконини беради;
• “MyID” — рақамли технологиялар соҳасида истиқболли стартап ва “Pastoral” — чорвачилик учун дунёдаги биринчи сунъий интеллект (AI) асосланган платформа бўлиб, Telegram орқали ҳайвонлар тўғрисида интеллектуал маълумотларни таклиф қилади.

Бўлиб ўтган тадбир давомида IT Park резидентлари АҚШ инновацион экотизимининг етакчи вакиллари билан алоқалар ўрнатишди. Бу Ўзбекистон технология секторидаги ўсиш ва инновациялар салоҳиятини, шунингдек, маҳаллий ва халқаро инвесторларнинг мамлакат стартап экотизимини қўллаб-қувватлашга қизиқиши ортиб бораётганини кўрсатади.

Шу билан бирга, “Рақамли асрда Буюк Ипак йўлининг тикланиши” панел сессияси Ўзбекистон, Озарбайжон, Қирғизистон ва Қозоғистон минтақалар раҳбарлари иштирокида ташкил этилди. Муҳокама кўпчиликнинг эътиборини тортди ва асосий экспертлар сифатида: IT Park ижрочи директори Абдулаҳад Қўчқоров, Қозоғистон Рақамли ривожланиш, инновациялар ва аэрокосмик саноат вазири ўринбосари Асқар Жамбакин, Инновациялар ва рақамли ривожланиш агентлиги (Озарбайжон) раиси вазифасини бажарувчи Инара Валиева, шунингдек, ҳудуд тўғрисида тўлиқ тақдимот билан “Silkroad Innovation Hub” асосчиси ва бош директори Ассет Абдуллаев иштирок этишди.

IT Park ижрочи директори “Ўзбекистон — BPO ва IT-аутсорсинг учун янги хаб” мавзусида тақдимот қилди. Тақдимот давомида янги стратегик ёндашув — “Zero Risk” дастури ҳақида маълумот берилди, бу эса мамлакатимиз ҳудудида хорижий тадбиркорликни рўйхатдан ўтказиш ва юритишни сезиларли даражада осонлаштиради ҳамда мамлакатнинг меҳнат салоҳиятини оширишда ёрдам беради.

IT Park вакили ёш IT-иқтидорлар орасида инглиз тилини билиш даражаси баландлигини, солиқ имтиёзлари ва келажак режаларини қайд этиб, Ўзбекистоннинг келгусидаги асосий мақсади — Ўзбекистоннинг IT-экспорт ҳажмини 5 миллиард АҚШ долларига етказиш, шундан 3 миллиард доллар АҚШ бозоридан келишини таъкидлади.

Маълумот учун: “TechCrunch Disrupt” — стартап ҳамжамиятининг етакчи халқаро тадбирларидан бири бўлиб, ҳар йили бутун дунё бўйлаб тадбиркорлар, инвесторлар ва журналистларни технология оламидаги сўнгги тенденциялар ва инновацияларни муҳокама қилиш учун бирлаштиради.