Баъзи таксиларга ўтириб, бу ҳайдовчининг мақсади ишлаб пул топиш эмас, йўловчилар билан мириқиб суҳбатлашиш бўлса керак, деб ўйлаб қоласан. Ҳатто айримларининг эзмалигидан чарчаб ҳам кетасан. Лекин яқинда бир таксига ўтирдим-у, манзилимга етгунча анча-мунча нарсани билиб олдим.

Айтишича, кира қилиш учун лицензия варақасини онлайн олганидан роса хурсанд бўлибди.

– Аввалига жўраларим солиқ инспекциясига бориб, ўзини банд қилган шахс сифатида рўйхатдан ўтишим кераклигини айтишганди. Кейин билсам, буни my.gov.uz орқали онлайн амалга оширсаям бўларкан. Шуниси маъқул келиб,  дарров рўйхатдан ўтдим. Хизматдан my.gov.uz орқали фойдаланиш текин экан, – деди ҳайдовчи. – Кейин шу порталнинг ўзидан енгил автомобилда йўловчи ташиш лицензия варақасини олдим. Бир йиллик давлат божи учун 270 минг сўм тўладим. Агар Давлат хизматлари марказига бориб олганимда 30 минг кўп тўларканман. Яна бориб-келишга бензиним ҳам кетарди.

Ҳайдовчининг гапига ишонқирамай, дарров телефонимдан интернетга кирдим ва қидирувга бердим. Ростанам бунинг иложи бор экан.