30 йилдан кўпроқ вақт олдин Билл Гейтс офисда ва уйда компьютерлар қандай ўрин эгаллашини биринчилардан бўлиб тушунган эди. Бугунги кунда унинг дастурлари дунёдаги барча компьютерларнинг деярли 90 фоизида қўлланилади.

Қаҳрамонимиз 1955 йил 28 октабрда АҚШнинг Сиэтл шаҳрида бадавлат оилада туғилган. Ота-онаси болалигидан унинг таълимига катта эътибор қаратишган. Ўзига хос ва шўх болакай аутизмга чалинган эди. Аниқроқ айтганда, аутизмнинг енгил шакли - Аспергер синдроми билан оғриган. Аспергер синдроми аслида касаллик эмас, балки идрок этиш хусусиятидир. Шунчаки улар бошқалар билан мулоқот қилишда қийинчиликларга дуч келишади ва ёлғиз қолишни хуш кўришади. Бола Биллнинг ўз олами бўлиб, у билимларни яхши қабул қилар, дарсларни тенгдошларидан яхши тушунарди. У 20 жилдлик энциклопедияни ўқиб, саҳифама-саҳифа синчиклаб ўрганар эди.

Мактаб пайтиданоқ Билл дастурлашга қизиқар, кўп вақтини компьютер синфида ўтказиб, бошқа дарсларга кирмай қўйганди. Бир куни у ўзидан 2 синф юқорида ўқийдиган Пол Аллен исмли йигит билан танишди. У ҳам ўзига ўхшаб "компьютер жинниси" эди. Улар биргаликда мактаб жадвалини автоматик равишда тузадиган ва ўша вақт учун ноёб бўлган биринчи дастурни ишлаб чиқдилар. Йигитлар мактаб директоридан бу учун беш юз доллар мукофот олишди. 17 ёшида Гейтс дўсти билан йўл ҳаракатини таҳлил қиладиган дастурни ёзган. Бу учун ёшлар 20 000 АҚШ доллари ишлаб олдилар.

Ўрта мактабни тугатгач, у Гарвард университетига ўқишга кирди ва дастурлаш бўйича ўқишни давом эттирди. Йигитлар яна дастурлар яратиш орқали пул топишда давом этиб, йиғилган пуллардан "Microsoft" компаниясига асос солдилар. Бу учун шаҳар четидаги кичик офисни ижарага олишди. 1978 йилда компанияда атиги ўн бир киши бор эди. Билл мижозлар билан шартномалар ва музокаралар учун масъул эди, Пол техник ёрдам билан шуғулланган.

Йигирма тўрт ёшида Гейтс "IBM" билан шартнома имзолади. Бошланган бу бизнес уни  сайёрадаги энг бой ва қудратли одамга айлантиришини балки ўша пайт ўзи билмагандир.