Қаҳрамонларимиз IТ соҳасида фаoлият бошлаб, биргаликда янги ассоциация очиш устида ишлаётган икки дўст – Азизбек Қобилов ва Беҳзод Маҳкамовлардир.

Азизбек ҚОБИЛОВ 1998 йили Андижон шаҳрида туғилган;

2016-2020 йиллар давомида INHA университетининг Computer Science and Engineering йўналишида таҳсил олган;

2016 йилдан буён дастурлаш соҳасида Mobile, Web, Desktop ва Artificial Intelligence engineering йўналишларида фаолият юритиб келмоқда;

2017 йилдан эса дастурчилар гуруҳи билан бирга чет эл ва маҳаллий лойиҳалар устида ишламоқда;

2019 йили INHA Summer School танловида қатнашиб, Жанубий Кореядаги INHA университети томонидан ташкил этилган мактабда ўқиш грантини қўлга киритган;

2020-2021 йилларда Bobur Akilkhanov Tech Academy дастурлаш мактабида Senior Mentor сифатида 60 дан зиёд дастурчиларни тайёрлаган;

Ҳозирги кунда Creative Advanced Technologies компаниясида Backend Development Team Lead лавозимида фаолият олиб боради.

Беҳзодхон МАҲКАМОВ 1997 йили Тошкент шаҳрида туғилган;

2016-2020 йиллар давомида INHA университетида Computer Science and Engineering факультетида таълим олган;

2019 йилда IТ-Паркнинг инкубация дастурида Worklens номли лойиҳаси билан қатнашган;

2020 йилда Covid-19 Challenge мусобақасида жамоаси билан қатнашиб, $10000 грант ютиб олган;

2021 йилдан буён Zip24 компаниясида бош дизайнер лавозимида ишлаб келади;

Ҳозирги кунда UX/UI бўйича хизмат кўрсатувчи Malevich DGTL номли дизайн студиясини очган.

Болаликдаги орзу… IТ соҳасига кириб келиши...

Азизбек: – Болалигимда космонавт бўлишни орзу қилганман. Аммо Америка стандартларига кўра, бўйим тўғри келмагани учун тиббиёт соҳасига кириш ҳақида ўйлай бошлаганман. Энди тиббиёт йўналишига ўқишга кирмоқчи бўлиб юрган пайтларимда эса келажак IТ мутахассислар қўлида эканини англаб етганман. Шу сабаб танловимни ўзгартирганман.

Беҳзодхон: – Менинг болалигим асосан шифохонада ўтгани учун келажакда шифокор бўламан, деб ният қилардим. Лекин 10-12 йиллаб ўқишга сабрим етмаса керак, деб компьютер технологияларига ихтисослашган академик лицейга ўқишга кирганман. Шу тариқа IТ оламига илк қадамимни қўйганман.

Нега айнан IТ мутахассиси?

Азизбек: – Сир эмас, кўпчиликни IТ соҳасига қизиқтирадиган нарса бу – пул. Статистикага қарайдиган бўлсак, дунё бўйича энг кўп пул топиладиган соҳа ҳам айнан IТ экан. Айнан шу омил IТ соҳасига киришимга сабаб бўлган.

Беҳзодхон: – Академик лицейда ўқиб юрган пайтларим (2-босқичда), янги очилган INHA университетига экскурсияга олиб келишган. Ўшанда айнан компьютер технологиялари соҳаси менинг келажагим эканлигини англаб етганман.

Аёлларнинг IТ соҳасида ишлаши қанчалик тўғри?

Азизбек: – Баъзи қизлар бу соҳани эплай оламанми-йўқми деган шубҳага боришади. Илмий жиҳатдан олиб қараганда, аёлнинг мияси эркакникидан кучлироқ бўлиши исботланган, яъни ҳисоб-китобларга яхши деган маънода. Шундай экан, нега бу соҳада аёллар ишламаслиги керак?..

Беҳзодхон: – IТ соҳасига қизлар жудаям керак. Чунки улар олдиларига қўйилган вазифаларни эркакларга нисбатан масъулият билан бажаришади. Буни ўз тажрибамда ҳам кузатганман. Шахсан ўзим аёлларнинг IТ соҳасида ишлашига ижобий фикр билдираман.

Агар бошқа касбни танлаш имконияти берилса...

Азизбек: – Агар шундай имконият берилса, жарроҳ бўлардим. Чунки бу касбга қизиқишим ҳалигача сақланиб қолган. Ҳатто ўтган йилги туғилган кунимда яқинларим жарроҳлик ускуналарини совға қилишган.

Беҳзодхон: – Тўғрисини айтсам, менга бундай имконият берилиши шарт эмас. Чунки инсоннинг ўзида хоҳиш бўлса, истаган пайтида, истаган соҳаси билан шуғулланиши ва ҳаттоки бутун бошли ҳаётини ҳам ўзгартириб юбориши мумкин. Масалан, мен дизайнерман ва бу соҳадан зериксам, архитектура билан шуғуллансам бўлади.

IТнинг ҳаётингизда тутган ўрни?..

Азизбек: – Ҳозирги кунга келиб IТ соҳаси ҳаётимнинг ажралмас қисмига айланиб улгурди. Мен уни мўъжизага қиёслаган бўлардим. Чунки IТ – бизнинг келажагимиз. Шундай экан, у нафақат IТ мутахассислари, балки барча инсонлар ҳаётидаги муҳим омиллардан бири.

Беҳзодхон: – IТ менинг ҳаётимда ҳам муҳим аҳамиятга эга. Агар унга таъриф берсам, аввало, тезлик, ривожланиш ва янги имкониятлар эшиги, деган бўлардим. Чунки биз бу соҳада ўз юртимизда ишлаш билан бир вақтда Америкада ҳам фаолият юритишимиз мумкин.

Иш бошлашдаги қийинчиликлар…

Азизбек: – IТ соҳасида, аввало, ноутбук, компьютер керак бўлади. Илк компьютеримни қарзга олинган пулга харид қилганман. Ҳозирги кунда бу соҳани танлаган ёшларнинг энг катта муаммоси бу – тил билмаслиги. Ҳеч бўлмаганда рус тилини ўрганиш керак. Чунки IТга оид асосий қўлланмалар, интернетдаги видеоматериаллар рус ва инглиз тилида. Ўз тажрибамда ҳам хорижий тилдаги IТ атамаларни тушунмай, қийналадиган талабаларни кўп кузатганман.

Беҳзодхон: – Мен ҳам айнан шундай муаммога дуч келганман. Компьютер сотиб олишга пулим бўлмаган. Аммо шу соҳага иштиёқим баландлиги учун қарз олиб, ишлатилган компьютердан фойдаланганман.

Қарзга компьютер олиб иш бошлаган йигитлар бугун қанча маош олиши ва бу соҳада ҳамкорлик қанчалик муҳим эканлиги сизга ҳам қизиқ бўлса, суҳбатнинг тўлиқ шаклини ict.xabar.uz сайтининг YouTube каналида томоша қилинг. Асосийси, изоҳларда ўз фикр-мулоҳазаларингизни ёзиб қолдиришни унутманг!

Эъзоза Турғунова суҳбатлашди.