АйТи Парк Узбекистан, “Gyeongbuk TechnoPark” ва Корея Республикасининг “Gyeongbuk Development Institute ” олий таълим муассасаси ўртасида ахборот технологиялари соҳасида ўзаро англашув ва ҳамкорлик меморандуми имзоланди.

Меморандум “Gyeongbuk TechnoPark ” бош директори Ин Сон Ҳа (In Seong Ha), “Gyeongbuk Development Institute ” президенти Чул Кён Лю (Chul Gyun Lyou) ва АйТи Парк Узбекистан ижрочи директори Абдулаҳад Кучкаров томонидан имзоланди.

Меморандум икки мамлакат ўртасидаги ҳамкорлик ва ахборот саноатини ривожлантиришга қаратилган. Асосий жиҳатлар қаторидан Корея Республикаси ва Ўзбекистон АйТи-саноатига хусусий секторни фаол жалб этиш орқали икки томонлама ҳамкорликни кенгайтириш, ахборот алмашиш, иккала мамлакат компаниялари учун экспорт фаолиятини соддалаштириш ва инвестицияларни жалб қилиш мақсадида маъмурий қўллаб-қувватлаш ўрин олган.

Битимнинг имзоланиши Корея Республикаси ва Ўзбекистон ўртасида рақамли технологиялар соҳасидаги ҳамкорликни янада ривожлантириш учун замин яратади.