2024-yil 24-dekabrda O‘zbekiston Raqamli texnologiyalar vazirligida muhim voqea – ayollarning axborot texnologiyalari sohasidagi yutuqlariga bag‘ishlangan ilk “Yulduz Tech Awards” taqdirlash marosimi bo‘lib o‘tdi. Tadbirdan maqsad ularning IT rivojiga qo‘shgan hissasini e’tirof etish, motivatsiyani qo‘llab-quvvatlash va professional aloqalarni mustahkamlashdan iborat.

Taqdirlash marosimida 25 nafar xotin-qizlarga IT sohasida erishgan yuksak yutuqlari uchun esdalik statuyetkalari topshirildi. Bu mukofotlar ularning mehnati e’tirofi, kasbiy mahorati va kelajak avlodlar uchun ilhom timsoliga aylandi.

O‘zbekiston IT sohasida ayollarni qo‘llab-quvvatlash borasida sezilarli yutuqlarni namoyish etmoqda. Mamlakat Coursera platformasida onlayn ta’lim bo‘yicha yetakchilik qiladi, bu yerda talabalarning 49 foizi ayollardir. “One Million Uzbek Programmers ”, IT-iste’dod va xalqaro IT sertifikatlari uchun xarajatlarni qoplash kabi dasturlar yoshlarga jahon ta’lim standartlaridan foydalanish imkonini beradi. Bundan tashqari, O‘zbekiston ITva STEM sohasida ayollar salohiyatini rivojlantirishga qaratilgan sa’y-harakatlar tufayli amalga oshirilgan Gender tengligi va boshqaruv indeksi (GEGI) reytingida 103-o‘rindan 52-o‘ringa ko‘tarildi.

“Mamlakatimizda axborot texnologiyalari sohasida faol rivojlanayotgan iste’dodli ayollar avlodining o‘sib borayotganidan faxrlanamiz. IT sohasida ayollarni qo‘llab-quvvatlash davlat siyosatining muhim yo‘nalishi hisoblanadi va biz ularning professional o‘sishi va muvaffaqiyatli karerasi uchun imkoniyatlar yaratishda davom etamiz”, — dedi Raqamli texnologiyalar vazirining maslahatchisi Kamola Sobirova.

Tadbir tajriba almashish, aloqalarni yo‘lga qo‘yish, murabbiylik va ta’lim tashabbuslarining ahamiyatini muhokama qilish uchun maydonga aylandi. Tashkilotchilar IT sohasida ayollar salohiyatini qo‘llab-quvvatlashni davom ettirish maqsadida “Yulduz Tech Awards” mukofotini yillik tadbirga aylantirishni rejalashtirmoqda.

Tadbir Raqamli texnologiyalar vazirligi tomonidan Yandex Uzbekistan, TBC Uzbekistan, IT Park, Korzinka, ZTE, Click, Qand, IT ta’limi assotsiatsiyasi, Women in Tech Uzbekistan, Lerna, GAP va IT Ladies hamjamiyatlari ko‘magida tashkil etildi.