IT Park Uzbekistan delegatsiyasi Seulga ishbilarmonlik tashrifini amalga oshirmoqda. Tashrif doirasida dunyodagi yirik GameDev kompaniyalaridan biri — “Krafton” rahbariyati bilan uchrashuv bo‘lib o‘tdi.

2007-yilda asos solingan “Krafton” kompaniyasi “TERA”, “PUBG: Battlegrounds”, “New State Mobile”, “The Callisto Protocol” va “Moonbreaker” kabi video o‘yinlarning yetakchi ishlab chiqaruvchisi va nashriyotchisi sifatida tanilgan. Markaziy ofisi Seulda joylashgan va 2500 nafar xodimga ega bo‘lgan kompaniya o‘yin sanoatida yetakchi o‘rinni egallab kelmoqda.

Uchrashuvda O‘zbekistonda “Krafton” ofisini ochish imkoniyati va kompaniya uchun potensial afzalliklar muhokama qilindi. IT Park vakillari IT va GameDev kompaniyalari uchun mavjud bo‘lgan soliq imtiyozlari va qo‘llab-quvvatlash dasturlarini taqdim etdilar. Bu dasturlar operatsion xarajatlarni sezilarli darajada optimallashtirish imkonini beradi. Kelajakda O‘zbekistonda “Krafton” ofisining ochilishi nafaqat “PUBG” kabi mashhur o‘yinlar uchun mahalliy auditoriyaga kirishni osonlashtiradi, balki kompaniyaga moliyaviy va strategik ustunliklar ham taqdim etadi.

Bundan tashqari, tomonlar kelgusi yilda O‘zbekistonda yirik GameDev xakatonini tashkil etish masalasini muhokama qildilar. Ushbu tadbir mahalliy geymerlar va ishlab chiquvchilarni jalb qilib, “Krafton” mahsulotlarining taniqliligini oshiradi hamda mintaqada iste’dodlarni topishga imkon yaratadi.

“Krafton” vakillari ta’kidlashicha, O‘zbekiston GameDev kompaniyalari uchun eng jozibador bozorlardan biri hisoblanadi, chunki mamlakat aholisining 60 foizi 30 yoshdan kichik. Bu yosh auditoriya nafaqat zamonaviy o‘yin tendensiyalarini yaxshi tushunadi, balki o‘yinga bo‘lgan qiziqishiniistiqbolli mahsulotlarga aylantirish qobiliyatiga ega. Bu esa mintaqani kompaniya uchun ayniqsa qiziqarli qiladi.

IT Park Uzbekistanning o‘yin sanoatining jahon yetakchisiga tashrifi xalqaro hamkorlikni rivojlantirish va O‘zbekistonni global IT va GameDev kompaniyalari uchun istiqbolli markaz sifatida ilgari surish istagini tasdiqlaydi. “Krafton” kompaniyasining O‘zbekistonda ofis ochisi ikkala tomon uchun ham muhim qadam bo‘lib, o‘yin sanoatini rivojlantirishni qo‘llab-quvvatlaydi va o‘zaro o‘sish uchun yangi istiqbollarni taqdim etadi.