Яқинда уйимизни таъмирдан чиқардик. Ошхонани бошқа жойга кўчирганимиз учун ичимлик суви ҳисоблагичи жойини ўзгартиришга тўғри келди. Бу битта уста билан битадиган иш эмас экан. Ёзув-чизув, расмий ҳужжатлар, идорама-идора юриш деганидек... Бунга эрталабдан кечгача ишда бўлган турмуш ўртоғимда ҳам, усталарга овқат пишириш билан банд бўлган менда ҳам вақт топилмади.

Ўша кунлари уйимизга “Хорманглар” деб келган акамга шу ҳақида айтгандим, “Нима, замондан орқада қолганмисизлар? Буни онлайн ҳал қилса бўлади-ку” деб қолди. Айтишича, my.gov.uz хизматлари орасида совуқ сув ҳисоблагичини ечиш, ўрнатиш ва тамғалашга оиди ҳам бор экан. Яъни ариза уйдан чиқмаган ҳолда – портал орқали онлайн тўлдириларкан.

Кечки пайт турмуш ўртоғим ишдан қайтганида акамдан эшитганларимни айтдим. Аввалига “Йўғ-ей, қўйсанг-чи”, деб ишонмади. Кейин қўл телефонидан интернетга кириб синаб кўрди. Ариза тўлдириш жараёнида ўзи ҳақидаги маълумотлар автоматик равишда чиқиб келганида иккимиз ҳам ҳайрон қолдик. Шунча пайт чўзиб юрилган ишни бир зумда, уйда кечки овқат устида, яна бепул битириб олдик. Бундай имконият борлигини бошқалар ҳам билишармикин?