«Plug and Play» платформаси жорий йил якунига қадар Тошкентда ўз офисини очиши ҳақида хабар берди. Ўзбекистон Республикаси Aхборот технологиялари ва коммуникацияларини ривожлантириш вазирлиги, IT Park Uzbekistan ҳамда «AloqaVentures» билан кечган учрашувлардан сўнг «Plug and Play» Ўзбекистон пойтахтида ўз ваколатхонасини ишга тушириши ҳақида расман эълон қилди. Дастур доирасидаги ҳамкорликнинг дастлабки босқичи молиявий технологиялар, суғурта ва корпоратив технологиялар ҳамда таълим йўналишларини қамраб олади.

«Plug and Play Tech Center» асосчиси ва бош ижрочи директори Саид Aмиди:

«Минтақадаги энг ёш ва жадал ривожланаётган экотизимлардан бири сифатида «Plug and Play» Ўзбекистоннинг маҳаллий корпоратив экотизимига ахборот технологиялари ва инновация соҳасида энг юқори халқаро стандартларга эришишда ёрдам беришни мақсад қилган. Шу билан бирга, дастур дунёнинг етакчи стратегик бозорларида ўзига хос майдон тақдим этиш орқали маҳаллий истеъдодлар ва тадбиркорларни қўллаб-қувватлайди».

Офис маҳаллий корпорациялар ва агентликлар учун стартаплар билан яқиндан ҳамкорлик қилиш учун кўпроқ имкониятлар яратишга, қолаверса, минтақадаги стартап экотизимини жадаллаштиришга хизмат қилади. «Plug and Play» билан ҳамкорлик, шунингдек, стартапларга халқаро бозорга чиқишга ёрдам беради, негаки улар бутун дунё бўйлаб 40 дан ортиқ ваколатхоналардан иборат глобал тармоққа қўшилиш имкониятига эга бўладилар.

IT Park Uzbekistan директори Фарҳод Ибрагимов:

«Plug and Play» техник марказининг ташкил этилиши Ўзбекистон стартап экотизимлари учун улкан воқеадир. Бизнинг маҳаллий стартапларимиз «Plug and Play» ваколатхоналари жойлашган 35 мамлакатда ўз лойиҳаларини намойиш этиш имкониятига эга бўлади. Қолаверса, бу ўзбекистонлик стартап тадбиркорларга халқаро бозорда сифат ва рақобатбардошликни оширишга кўмак берибгина қолмай бизнинг мамлакатимиздан илк «яккашох» яратиш йўлида жипслаштиради ва экотизим ҳамкорларимиз (венчур фондлари, бизнес фаришталари (business angels) ўз фаолиятларини кенгайтиришлари учун янги имкониятлар эшигини очади».

2 май куни IT Park директори Фарҳод Ибрагимов Германиянинг Штутгарт шаҳридаги «Plug and Play» офисларидан бирига ташриф буюриб, у ерда Plug and Play ЕМЕA ҳамраҳбари Сина Aмиди, компаниянинг Германиядаги бошқарувчи директори Саша Каримпур ҳамда Штутгартдаги корпоратив ҳамкорлик бўйича менежер Феликс Ламмерс билан учрашди. Учрашувда томонлар янги платформа очиш масаласини муҳокама қилишди. Тез орада режалар тасдиқланиб, якунига етказилди ва эндиликда «Plug and Play» компанияси Тошкентда расман ўз ваколатхонасини очмоқда.

«Plug and Play» истиқболли корпорациялар, давлат идоралари, университетлар, шунингдек венчур капиталистлари ва стартаплар билан ҳамкорлик қилишга интилади. «Plug and Play» офисининг очилиши ҳукуматимиз томонидан олиб борилаётган Ўзбекистоннинг инновацион стратегияси дастурида муҳим босқич саналади, шунингдек, глобал платформа тармоғида унинг яна бир аъзоси пайдо бўлишига хизмат қилади.

«Plug and Play»

«Plug and Play» – стартаплар, корпорациялар, венчур капитал фирмалари, университет ва давлат идораларини бирлаштирувчи етакчи инновацион платформа. «Plug and Play» компанияси беш қитъада 40 дан ортиқ манзилларда фаолият юритади, бош офиси эса Силикон водийсида жойлашган. Корпоратив инновацион дастурларни таклиф қилган ҳолда корпоратив ҳамкорларига инновацион йўналишларининг ҳар бир босқичида, таълимдан тортиб то амалда татбиқ этишгача кўмак кўрсатади. Шунингдек, стартап-акселераторларини ишга тушириш баробарида турли соҳаларга инновацияларни татбиқ этиш мақсадида ўз венчур фондини ташкил қилган. Натижада Dropbox, Guardant Health, Honey, Lending Club, N26, PayPal ва Rappi каби юзлаб муваффақиятли компанияларга сармоя киритишга эришган.