Малайзиянинг Куала-Лумпур шаҳрида ўтказилаётган “QS Higher Education Summit Asia Pacific 2023” саммити доирасида QS рейтинг ташкилоти Осиё университетларининг 2024 йил учун рейтинг (QS Asia University Rankings 2024) натижаларини эълон қилди.

Унга кўра, мамлакатимизнинг 6 та ҳудудидан 14 та олий таълим муассасаси ТОП-1000 таликдаги Осиёнинг энг яхши университетлари рўйхатига киритилди. Улар орасида Тошкент ахборот технологиялари университети (651–700) ҳам бор.

Жорий йилда халқаро тан олинганлик даражаси, илмий-тадқиқотлар ривожи, таълим сифати, халқаро ҳамкорлик, академик мобиллик соҳалари бўйича Осиё олийгоҳлари рейтингида 25 та давлатдан 856 та (148 та илк марта) олийгоҳ иштирок этди.

Бунда Ўзбекистондаги 3 та ОТМ — Ўзбекистон миллий университети (ЎзМУ), “Тошкент ирригация ва қишлоқ хўжалигини механизациялаш муҳандислари институти“ миллий тадқиқот университети (“ТИҚХММИ“ МТУ), Тошкент давлат иқтисодиёт университети (ТДИУ) “Академик репутация” индикатори бўйича ТОП-200 олийгоҳлар қаторидан ўрин эгаллади. ЎзМУ “Академик репутация” бўйича нисбатан етакчи бўлиб, 135-ўринда қайд этилди. Мазкур индикатор бўйича 7 та ОТМ ўз ўрнини яхшилашга эришган. “ТИҚХММИ“ МТУ “Иш берувчилар ўртасидаги репутация” индикатори бўйича 208-ўринни, “Профессор-ўқитувчилар ва талабалар нисбати” индикатори бўйича 124-ўринни эгаллади.

Халқаро рейтингларда илмий-тадқиқотлар ривожи республика ОТМларининг эгаллаган ўрнини яхшилашда асосий имкониятларидан бири бўлиб қолмоқда. “ТИҚХММИ“ МТУ республикада “илм-метрик“ кўрсаткичлар, жумладан, битта мақолага нисбатан иқтибослар сони билан ўлчанувчи илмий ишларнинг таъсир доираси (мазкур кўрсаткич бўйича Осиё олийгоҳлари орасида 768-ўрин) ва бир нафар профессор-ўқитувчига тўғри келувчи илмий мақолалар сони билан ўлчанувчи илмий-тадқиқот самарадорлиги (мазкур кўрсаткич бўйича Осиё олийгоҳлари орасида 615-ўрин) бўйича етакчи сифатида қайд қилинди.

ЎзМУ республикада халқаро илмий коллаборациялар билан ҳамкорлик бўйича нисбатан фаол ОТМ сифатида қайд қилинган бўлиб, “Халқаро илмий коллаборациялар индекси” индикатори бўйича 578-ўринни эгаллади. Шунингдек, “ТИҚХММИ“ МТУ “Илмий даражага эга бўлган профессор-ўқитувчилар улуши” индикатори бўйича республика ОТМлари орасида етакчи бўлиб, 376-ўринни эгаллади. ЎзМУ “Хорижий профессор-ўқитувчилар улуши” бўйича минтақавий рейтингда юқори натижани қайд қилган бўлса (90-ўрин), ТДИУ “Хорижий талабалар улуши” бўйича минтақавий рейтингда 130-ўринда қайд қилинди.