Рақамли технологиялар вазири Шерзод Шерматов ташриф доирасида Қатар илмий-технологик парки президенти доктор Жек Лау билан учрашиб, инновациялар соҳасида қўшма саъй-ҳаракатларни илгари суриш, стартапларни қўллаб-қувватлаш, сармоя жалб этиш ва АйТи-соҳасида ҳамкорликни кенгайтириш масалаларини муҳокама қилди.

Учрашувда IT Park Узбекистан стартаплар ва АйТи-компанияларни қўллаб-қувватлаш бўйича ўзининг кенг қамровли дастурларини тақдим этиб, мавжуд ресурслар ва имтиёзларни таъкидлади.

Шунингдек, АйТи-таълим соҳасидаги ташаббусларни кенгайтириш ва экспортни ошириш учун янги имкониятлар яратиш мақсадида икки технопарк ўртасида келажакдаги ҳамкорлик алоқаларини мустаҳкамлашга алоҳида эътибор қаратилди.

Учрашувда яна бир муҳим йўналиш – Ўзбекистон стартапларини Қатар ва халқаро бозорларга чиқишда қўллаб-қувватлаш учун ҳар икки давлат стартап экотизимларининг кучли томонларидан фойдаланиш бўлди. Бунга Қатар Фан ва Технология Parkining Global Innovation Link дастурида қатнашиш киради, бу эса глобал таъсир ва кооперация учун платформадир.

Шу билан бирга, учрашув сўнгида Қатар фан ва технологиялар парки билан ҳамкорликни янада кенгайтириш ва Ўзбекистоннинг маҳаллий стартап экотизими билан кўпроқ танишиш мақсадида делегация 2025 йилга мўлжалланган барча халқаро АКТ конференциялари ва кўргазмаларида иштирок этишга таклиф қилинди.