Engadget портали, ўз анъанасига содиқ ҳолда, йил якунларини сарҳисоб қилди: IT-соҳанинг энг муваффақиятли ва муваффақиятсиз лойиҳаларини саралади.

Экспертлар 2023 йил саноат учун осон кечмаганига эътибор қаратишди: энг йирик ўйин конференцияларидан бири — E3нинг ёпилиши, оммалашган онлайн-платформаларнинг сифати ёмонлашиши, криптовалюталар ва молия (жумладан, нафақат Кремний водийсидаги, балки жаҳондаги айрим банклар) бозорларининг қулашига гувоҳ бўлдик. Аммо ёмон иқтисодий вазиятдан ҳам кўра, айрим бизнес лойиҳаларнинг қулаши нисбатан ёрқинроқ воқелалар сифатида эсда қолмоқда.

Мағлубиятлар

2023 йилнинг энг ёмон бешта IT-лойиҳаси орасида Илон Маск жаҳондаги “энг тартибсиз ижтимоий тармоқ”қа айлантирган X (собиқ Twitter) — 1-ўринда! Иккинчи ўринни савдоси бароридан келмаган Microsoft Surface планшетлари эгаллади (экспертлар “Microsoftнинг планшет ва ноутбукнинг чинакам гибридини яратиш орзуси” ўлганини таъкидлашмоқда).

“Орзулар ҳақида гапирарканмиз, Amazonнинг орзуси ҳам армонга айланганига тўхталмасак бўлмайди, компания шу йилнинг июлида ўзининг соғлиқни сақлаш соҳаси билан боғлиқ Halo аппарат маҳсулотлари туркумини қўллашни тўхтатди”, — деб ёзди Engadget.

Юқоридагилар қаторида муваффақиятсизлар қаторида E3 конференцияси, Binance ҳамда Reddit ҳам саналган.

Ғалабалар

Engadget йилнинг энг асосий технологик ютуғи сифатида X нинг рақиби — Threads (Metaга қарашли) ижтимоий тармоғини эътироф этди. Ишга туширилганида миллионлаб юклаб олинган ушбу иловага қизиқиш кейинчалик кескин пасайди, аммо яна ҳаммаси изга тушиб, ойига 100 млн киши фойдаланадиган иловага айланди — 2023 йилда у AppStore орқали юклаб олишлар сони бўйича 4-ўринга кўтарилди.

Йилнинг бизнес-муваффақиятлари орасида 2-ўринни ChatGPT (OpenAI) эгаллади, Bard ва Bing Chat каби рақиблар билан кураш, умуман, генератив сунъий интеллектга қизиқишни янада оширди.

Монополияга қарши қонунларга эҳтиром сифатида Apple компанияси RCS, USB-C ва Qi 2 ларни жорий этиши — учинчи ўринга лойиқ кўрилди.

Тўртинчи ва бешинчи ўринларда — буклама смартфонлар (Pixel Fold, OnePlus Open, Samsung) ва Apple Vision Pro қурилмаси. Шунингдек, чўнтак ўйин қурилмалари ва Илон Маскнинг Neuralink лойиҳаси йилнинг омадлилари қаторида санаб ўтилди.