Porsche Таycаn электромобилининг янгиланган версияси қандай ажойиб хусусиятларга эга бўлгани ҳақида эшитдингизми? Энг асосий янгиликлардан бири қувватланиш тезлиги ошди.

Бу ҳали ҳаммаси эмас, ушбу спорт автомобили компания тарихидаги энг тез ишлаб чиқарилган электромобилга айланди.

2023 йилги модел 79 кВт/соат ва 98 кВт/соат аккумулятор билан чиқарилган бўлса, Performance Battery Plus тўпламидаги янги версия эса 105 кВт/соат қувватга эга аккумулятор билан жиҳозланди.

Шу билан бирга, ишлаб чиқарувчилар автомобилнинг жуда тез қувватланиш хусусиятини ҳам алоҳида эътироф этишмоқда.

Яъни, ушбу электромобил бор-йўғи 18 дақиқа ичида нолдан 80 фоизгача қувватланади. Қолаверса, унинг қуввати паст ҳароратларда ҳам узоқ муддатга етади.

Бундан ташқари, янги Porsche Таycаnни ишлаб чиқаришда аэродинамик оптималлаштирилган ҳамда 21 дюймли ғилдираклар ва айланиш қаршилиги пасайтирилган шиналардан фойдаланган.

Топ моделнинг қуввати 700 кВт ёки 938 от кучига тенг бўлиши кутилмоқда. Аммо Porsche 10 сония давомида қўшимча 70 кВт/94 от кучи олиш имконини берувчи махсус режимни ҳам ўз ичига олган.

2025 йилда электромобил ишқибозлари эътиборига ҳавола этилиши кутилаётган Таycаn янги фаралар ва орқа чироқлар ҳамда ўзига хос олд қанотларга ҳам эга бўлди.

Шунингдек, чарм қопланган салон қисми Race-Tex микрофибер матоси билан алмаштирилди. Яна бир янгилик эса Apple CаrPlay тизимининг автомобил ички тизимига чуқурроқ интеграциялашувидир.

Янги Porsche Таycаnнинг нархи 101 395 – 210 995 доллар оралиғида бўлиши кутилмоқда. Автомобилнинг сотув жараёнлари эса шу йилнинг кузида бошланиши режалаштирилган.