Twitter микроблогида илк ёзув 2006 йил 21 март куни пайдо бўлган. Унинг асосчиси Жек Дорси "twttr созлайман" деб илк постни ёзган эди. Ҳа, аввалига унинг номида унли ҳарфлар бўлмаган.

Веб оламдаги ушбу майдон қисқа (энг кўпи 140 та рамздан иборат) хабарларни алмашиш учун ишлаб чиқилган. Бу кўплаб мижозлар, айниқса интернетга мобиль телефон орқали кирадиганларда катта қизиқиш уйғотди. Орадан бир йил ўтиб тармоқнинг машҳурлиги ортди ва хабарлари сони 20 мингтадан 60 мингтага етди. 2008 йилда Twitter миллиардлаб хабарларга эга бўлди.

Шу йили Дорси компания раҳбарлигидан кетиб, бошқа бизнесни бошлади. Унинг ўрнини Эван Уильямс эгаллади. Кейинги йиллар давомида бош директорлар бир неча марта алмашди ва бу албатта, иш сифатига салбий таъсир кўрсатди. Ўз навбатида, асосий инвесторлар ҳам ўзини четга олишни бошлади.

2011 йилга келибгина Twitter ўзини бироз ўнглаб олди. Дизайн ўзгариб, янги функциялар қўшилди, реклама кириб келди, турли тилларни қўллаб-қувватлади.

2017 йилда унда ёзилиши мумкин бўлган рамзлар 280 тага кўпайтирилди. 2019 йили илк номи Twttr жонланиб, янги илова шундай аталадиган бўлди. Бу дастур орқали янги ғояларни синаб кўриш имконияти бериларди. Ижобий натижа қайд этганлари Twitter платформасида жорий этиладиган бўлди.

Компания тарихи мобайнида унинг логотипи - мовий қушча 5 бор ўзгарган. Бренд номидаги ўзак сўз "tweet" қушларнинг чуғурлашини англатади. Бу билан қисқа хабарлар ҳамда эркинликка ишора қилинган ва шунинг учун ҳам логотип қаҳрамони сифатида қушча танланган. 

2022 йилдан эътиборан Илон Маск қўлида қолган ижтимоий тармоқ кўплаб саргузаштларни бошдан кечиргани сизга аён. Воқеалар ривожи тезлигидан "Twitter сериали" дея таърифлангани бежиз эмас.