Олимлар сунъий интеллектдан (СИ) сайёрамизнинг энг чекка бурчакларидаги йўқолиб кетиш хавфи остида турган турларни кузатишда фойдаланмоқда. Биолог Женна Лоусон атрофдаги табиат товушларини ва бу ноёб ҳайвонларнинг хатти-ҳаракатларини ёзиб олиш учун Оса ярим оролининг ўрмонларига 350 та аудио монитор ўрнатди.

Йиғилган маълумотларни ҳажми туфайли қўлда таҳлил қилиб бўлмади. Бироқ, ўргимчак маймунларининг чақирувларини тан олишга ўргатилган сунъий интеллект маълумотни бир зумда қайта ишлашга ва уларнинг ҳаракат йўналишларини аниқлашга муваффақ бўлди. Ушбу ёндашув 2021 йилда бошланган дунёдаги энг йирик ёввойи табиат акустик тадқиқотларидан бирининг бир қисми эди.

Лойиҳа муваффақиятидан илҳомланган Microsoft компанияси олимлари қуёш энергияси ва энергия тежовчи микросхемалар ёрдамида чекка ҳудудларда узоқ муддат ишлашга қодир бўлган янги “Sparrow” қурилмасини яратмоқда. Қурилма маълумотларни сунъий йўлдошлар орқали узатади, бу эса экотизимларни табиий ҳолатини бузмасдан кузатиш имконини беради.

Лойиҳа Колумбия ўрмонларида синовдан ўтказилади ва келажакда барча қитъаларда, жумладан Амазонка тропик ўрмонлари ва Африка саванналарида қурилмалар ўрнатиш режалаштирилган. Бундай мониторинг нафақат ноёб ҳайвонларни ҳимоя қилиш, балки экотизимлардаги ўзгаришларнинг уларнинг хатти-ҳаракатларига таъсирини янада самарали ўрганишга ёрдам беради.