Шу ҳафта AҚШ Конгресси аъзоси Жейк Окинклосс (Jake Auchincloss)  Вакиллар палатасида Open AI дан ChatGPT чатботи ёрдамида яратилган нутқ билан чиқиш қилди. У ўз нутқи билан қонунчилар эътиборини сунъий интеллектга асосланган технологияларнинг аҳамияти ва уларни янада ривожлантириш зарурлигига қаратмоқчи эди.

Конгрессменнинг қисқача нутқи нейрон тармоқларни янада ривожлантириш ва уларни инсон фаолиятининг турли соҳаларига интеграция қилиш учун Aмерика-Исроил сунъий интеллект марказини яратиш тўғрисидаги қонунни қабул қилиш зарурлигига бағишланди. Окинклосс ёрдамчилари билан биргаликда ChatGPT чатботига мазкур қонун лойиҳасини қўллаб-қувватлашда “Вакиллар палатасида нутқ сўзлаш учун 100 та сўз ёзиш” вазифасини топширди. Мавжуд маълумотларга кўра, AI алгоритми Вакиллар палатасида ўқилган матнни шакллантириш учун бир нечта уринишларни амалга оширди.

ChatGPT муваффақияти Open AI алгоритмини ишлаб чиқувчига катта сармояни жалб қилиш имконини берди. Яқинда Microsoft "кўп йиллик миллиард долларлик сармоя" орқали компания билан узоқ муддатли ҳамкорликни кенгайтиришни эълон қилди. Aввалроқ дастурий гигантнинг Open AI’га 10 миллиард доллар сармоя киритиш нияти ҳақида хабарлар пайдо бўлган эди.