Ватанимиз тарихи саҳифасига яна бир муҳим воқеа қўшилди. Боку шаҳрида бўлиб ўтаётган 74-Халқаро астронавтика конгрессида Халқаро астронавтика федерацияси ассамблеясининг навбатдаги сессиясида “Ўзбеккосмос” агентлиги Халқаро астронавтика федерациясига тўла ҳуқуқли аъзо бўлганини эълон қилди.

Халқаро астронавтика федерацияси (IAF) халқаро нодавлат, нотижорат илмий ташкилот бўлиб, у коинотни тинч мақсадларда тадқиқ қилиш муаммолари, шунингдек, ҳуқуқий нуқтаи назардан ракета ва космик масалалар билан шуғулланади.

Ташкилот 1950-йилда Парижда бўлиб ўтган I Халқаро Астронавтика Конгрессида 8 та давлат: Австрия, Аргентина, Буюк Британия, Дания, Испания, Франция, Германия, Швеция раҳбарлари томонидан ташкил этилган.

IAF вазифаларига қуйидагилар киради:

– тинчлик мақсадларида космонавтикани ривожлантиришга кўмаклашиш;

– космонавтикага оид маълумотларни кенг тарқатишда кўмаклашиш;

– кенг жамоатчиликнинг космонавтикага қизиқишини рағбатлантириш ва қўллаб-қувватлаш;

– халқаро ва миллий илмий-тадқиқот институтлари, университетлар ва компаниялар орқали космик тадқиқотларда иштирок этишни рағбатлантириш;

– космонавтика билан боғлиқ фаннинг барча соҳалари бўйича тадқиқотларга бағишланган академиялар, институтлар ва комиссияларда фаолиятни ривожлантириш;

– халқаро конгресслар, симпозиумлар, коллоквиумлар ва бошқа илмий мажлисларни чақириш;

– космонавтика ва коинотни тинч мақсадларда тадқиқ қилиш билан боғлиқ барча соҳаларда тегишли халқаро ва миллий ташкилотлар билан ҳамкорлик қилиш.

Мамлакатимизнинг IAF аъзолигига қўшилиши қуйидаги имкониятларни беради:

– етакчи космик давлатлар ва халқаро ташкилотлар билан космик соҳада ҳамкорликни кенгайтириш;

– мамлакатимизнинг жаҳон космик жамияти томонидан тан олиниши;

– молиявий имтиёзлар ва бонуслар;

– электрон кутубхонадан бепул фойдаланиш имконияти ва бошқалар.