Илон Маск, Билл Гейтс, Марк Цукерберг ва бошқа йирик технология соҳаси вакиллари АҚШ Сенатининг 60 дан ортиқ аъзоси билан ёпиқ йиғилишда сунъий интеллект хавф-хатарларини муҳокама қилишди. Ҳозирда ушбу соҳани тартибга солишга қаратилган қонун тайёрланмоқда.

Илон Маск сенаторларни сунъий интеллект инсониятга таҳдид солиши мумкинлигидан огоҳлантирди. Билл Гейтс мутлақо қарама-қарши фикр билдирди: сунъий интеллект дунёда очлик муаммосини ҳал қила олади. Йиғилганларнинг барчаси нейротармоқлар ҳукумат назорати остида ривожланиши кераклигига тарафдор бўлишди.

Инсонпарварлик технологиялари маркази нодавлат ташкилоти раҳбари Тристан Харрис бу ишланмалардан жиноятчилар ҳам манфаатдор бўлиши мумкинлигидан огоҳлантирди. Марк Цукерберг сунъий интеллект моделлари одамлар ва бизнес учун ўйин майдони эканини, у инновацияларни рағбатлантиришга ёрдам беришини айтди.

Йиғилишга таклиф қилинган сунъий интеллект бўйича тадқиқотчи Деб Ражи йиғилишда қатнашганларни ҳозирда технология қандай таҳдидларга эга бўлиши мумкинлигига эътибор қаратишга чақирди.