Фарзанд дунёга келганидан бошлаб 16 ёшгача эмланади. Бундай муҳим жараён ота-оналар томонидан назорат қилиб борилса, мақсадга мувофиқ бўларди. Чунки фақат поликлиника, боғча, мактаб томонидан айтилсагина бола эмланиши кераклигидан хабар топадиганлар талайгина. Агар ҳар бир оилада боланинг эмланиш тақвими юритилса, вакцинага олдиндан тайёргарлик кўриш, унинг вақтида эмланганига ишонч ҳосил қилиш мумкин. Эътибор берган бўлсангиз, шифокорлар вакцина олдидан пухта тайёргарлик кўришни тайинлайдилар. Бу иммунитет ҳосил бўлиши ва вакцинани енгил кўтаришда муҳим экан.

Вакцина олиш муддатини билган оналаргина болани бунга тўғри тайёрлаши мумкин. Хўш, тақвимни қаердан оламиз? Албатта, буни шифокордан сўраб ёзиб олиш, тасдиқланган жадвалдан нусха кўчириб, уйда сақлаш каби вариантлар бор. Лекин болали уйда бу тартибни ушлаб туриш қийин, излаганингни вақтида тополмай хуноб бўлиш ҳолати ҳам кўпчиликка таниш.

Шундай экан, my.gov.uz порталидаги "Болаларнинг эмланиш тақвими" орқали фарзандингизни туғилганидан бошлаб 16 ёшигача қачон ва қандай вакциналар билан эмланиши, у вакциналар қайси касалликларга қарши таъсир кўрсатиши ҳақида онлайн тўлиқ маълумот олиш энг мақбул йўл.

Болангиз неча кунлик (ойлик, ёш) эканини ёзсангиз, унга мос вакциналар рўйхати чиқиб келади. Оналар шунга қараб болани бемалол олдиндан тайёрлаши, поликлиникадан хабар кутмай, вакцина муддати келганда ўзлари талаб қилиши мумкин. Боғча-мактабдан вакцина олишга тўғри келганда "У вакцина нимага ўзи? Қачонгача олиниши керак?", деган саволларга ҳам ўрин қолмайди.

Бу фарзанд ўстираётган ҳар бир оила учун керакли маълумот, шундай эмасми?