Гап сунъий интеллект технологиялари ҳақида бораркан, Apple пешқадамлардан ортда қолаётгани кўзга ташланади. Аммо компания “шошмасанг — тез етасан” мақолини шиор қилиб олган кўринади: ими-жимида СИга исталган корпорациядан кўпроқ сармоя киритаётгани маълум бўлди.

PitchBook компанияси тадқиқотларига ишонадиган бўлсак, СИга ихтисослашган стартапларни сотиб олишда Apple бошқа йирик технокомпаниялардан ўзиб кетган. Хусусан, 2017 йилдан бери iPhone ишлаб чиқарувчиси 21 та СИ-стартапни ўзиники қилиб олган. 19 та стартапни харид қилган Accenture консалтинг компанияси (Ирландия) — иккинчи ўринда, Microsoft (12 та стартап) — учинчи, 8 та СИ-стартап харидорига айланган Alphabet (Google) — тўртинчи поғонада жойлашган.

Morgan Stanley ҳисоботида айтилишича, Apple сунъий интеллект бўйича эълон қилган бўш ўринларининг қарийб ярми “чуқур ўрганувчи”, яъни генератив нейротармоқлар технологияси бўйича мутахассислар учун ажратилган. Шу тариқа 2018 йилда Apple Googleнинг сунъий интеллект бўйича топ-менежери Жон Жаннандреани ўзига оғдириб олганди.

Apple СИ-ишланмаларини ёзнинг бошида, WWDC 2024 дастурчилар анжуманида тақдим этади, деган миш-мишлар бор. Аввалроқ Тим Кук (компания раҳбари) компания нейротармоқларни булутли сервисларда эмас, балки ўз қурилмаларида ишга туширишини билдирганди.