“IТ-мотивация” кўрсатувининг бугунги меҳмони — Олий Мажлис Сенати ҳузуридаги “Ёшлар парламенти” раиси ҳамда INNO GROUP инновацион ишланмалар компанияси асосчиларидан бири, “Шуҳрат” медали совриндори Беҳзод Тўхтамуродов.

2014­­–2018 йиллар — ТДТУ (бакалавр);

2018–2020 йиллар — ТДТУ (магистратура);

2019 йил – INNO GROUP асосчиларидан бири;

2019 йил – “Шуҳрат” медали совриндори;

2020 йил – ...ҳ.к. — Ўзбекистон-Япония ёшлар инновация маркази директори ўринбосари;

2022 йил – ...ҳ.к — Олий Мажлис Сенати ҳузуридаги “Ёшлар парламенти” раиси;

2022 йил – ...ҳ.к — Ислом Каримов номидаги ТДТУда мустақил изланувчи.

– Ҳозирда Ислом Каримов номидаги Тошкент давлат техника университетида мустақил изланувчисиз. Бакалаврлик ва магистратурани ҳам айнан шу университетда тамомлагансиз. Ўқишни хорижда давом эттириш истаги бўлмаганми?

– Албатта. Ҳатто бакалаврлик, кейинчалик магистратурада ўқиш жараёнида ҳам менда чет давлатларига кетиш учун имконият бўлган. Аммо мен айнан шу университетда ўзимга керакли барча билим ва кўникмаларга эга бўлдим ва бу қароримдан сира ҳам афсусланмайман.

– Нега айнан шу йўналишни танлагансиз?

– Муҳандислик — иқтисодиёт драйвери. Инженерлик соҳаси ниҳоятда қизиқ соҳа. У орқали кўплаб йўналишларда янгиликлар яратиш ва уни ғояга айлантириш мумкин. Балки шунинг учун ҳам бу соҳа менга қизиқ туюилгандир. Аслида инсонга нимадир ёқса, уни айнан нима учун яхши кўришини айтиш жуда ҳам қийин масала.

– 2019 йилда жамоангиз билан INNO GROUP га асос солиб, маркетолог сифатида фаолият юритишни бошлаган экансиз. 3D принтер ишлаб чиқариш фикри қаердан пайдо бўлди?

– Биласизми, бизда бу ғоя талабалик йилларимизда, ТДТУ томонидан Аmerican МаkerBot 3D принтери харид қилинганидан сўнг пайдо бўлди. Албатта, бунга катта маблағ сарфланганини кўргач, жамоамиз йигитлари билан келишиб, ўзимиз 3D-принтер яратишга қарор қилдик ва бунга муваффақ бўлдик. Айтиш жоизки, биз яратган қурилма нақ ўн баробар арзонга тушди. Компаниямиз эса 2019 йилда, президент Шавкат Мирзиёев томонидан 1 млрд сўм маблағ ажратилганидан сўнг, ташкил этилди. Компаниямизда 3D принтерли лабораториялар орқали 20 дан ортиқ ишлаб чиқариш йўналишларига хизмат кўрсатиб келинмоқда. Лойиҳамиз доирасида давлат раҳбарига 3D моделлаштириш технологиясини ривожлантириб, бошқа йўналишларда ҳам татбиқ этишга ваъда берган эдик. Лойиҳани туманлардаги 33 та мактабда амалга оширяпмиз. Мактабларнинг барчасида босқичма-босқич 3D моделлаштириш, прототиплаш лабораторияларини ўрнатяпмиз.

– 3D принтерлар ёрдамида ишлаб чиқарилган ногиронларга мўлжалланган “бионик протезлар” лойиҳангиз “Стартап ташаббуслари” танловида мукофотга муносиб топилган экан. Бир неча бор муваффақият келтирган ушбу протезларнинг бошқа муқобилларидан фарқи нимада?

– Ҳақиқатан ҳам, “Стартап ташаббуслари” танловида 3D принтер орқали ишлаб чиқарилган “бионик протез” лойиҳамиз энг яхши ёшлар стартапи деб топилган. Бионик протез — бу инсон нерв импулслари орқали ҳаракатга келтириладиган электрон-механик қурилма. Датчиклар қўл ёки оёқнинг шикастланган қисмига бириктирилган бўлиб, худди шу импулсларни таъминлайди. Улар протезнинг двигателларини ишга туширадилар. Бундай қурилма ёрдамида оддий протезларга қараганда анча эркин ҳаракат қилишлари мумкин. Биз яратган протез ҳам овозли бошқарув ёрдамида ишлайди ва у тармоқдан қувватланади.

Ҳозирда Олий Мажлис Сенати ҳузуридаги “Ёшлар парламенти” раиси сифатида ҳам фаолият юритаётган Беҳзод Тўхтамуродов ушбу вазифага киришганидан сўнг “Ёшлар парламенти”да қандай ўзгаришлар юз берди?

Янги раис қандай янгиликлар олиб кира олди? Ҳаётда ўз ўрнини топа олган ва кўплаб ютуқларга эришиб келаётган ёш қаҳрамонимизнинг муваффақиятлари сири нимада? Шу каби саволларга жавоб топишни ёки ёш депутатдан қимматли тавсиялар олишни  истасангиз, интервюнинг тўлиқ қисмини Xabar.uz ахборот-таҳлилий порталининг YouTube каналида томоша қилинг.

Эъзоза Турғунова суҳбатлашди