SpaceX компанияси 14 ёшли Кайран Квазини ишга олди. Хабарга кўра, “компютер фанлари ва инженерия” мутахассиси дипломини қўлга киритган Кайран космик компанияда дастурчи-муҳандис сифатида Starlink йўлдошли интернетини ривожлантиришда иштирок этади.

Кайран Квази ҳозир 14 ёшда, бу йил Санта-Клара (АҚШ) университети бакалаври дипломини олади — университетнинг 172 йиллик тарихида ҳали бунақаси бўлмаган. Табиийки, шундай иқтидор эгаси эътибордан четда қолиши мумкин эмас эди, охир-оқибат ёш даҳони ўз жамоасига қўшиб олиш Илон Маскка насиб этди.

Маълумот учун: SpaceX компаниясига ишга киришга ариза топширганларнинг атиги 0,2 фоизигина ишли бўлади.

“Ҳаётимдаги янги босқич бошланганидан шодман”, — деди Кайран ишга олинганидан сўнг.

Кайрандаги иқтидор болалигида намоён бўлган, онаси турли китобларни ўқиб берганида диққат билан тингларди. 2 ёшидаёқ бурро гапиришни бошлаган, шифокорлар  онасига уни мактабгача таълимга топширишни тавсия қилишган. Кейинроқ ундаги IQ кўрсаткичи сайёрамиздаги 99,9 фоиз одамларникидан юқорилиги тасдиқланган.

Кайран 10 ёшида Intel Labs компаниясида сунъий интеллектни тадқиқ қилиш бўйича илмий ходим сифатида амалиёт ўтагани назарда тутилса, унда улкан компанияларда ишлаш тажрибаси етарли.