Қашқадарё вилоятида АйТи соҳасини ривожлантириш ва масофавий хизматлар экспортини кенгайтириш бўйича муҳим учрашув бўлиб ўтди. 

Вилоят ҳокими Масофавий хизматлар экспорт марказига ташриф буюриб, соҳа вакиллари ҳамда ёш мутахассислар билан учрашди. Тадбирда АйТи ва хизматлар экспорти йўналишида фаолият юритаётган етакчи компаниялар вакиллари ҳам иштирок этди.

Мазкур учрашувда "NNT Express Inc” МЧЖ, “IT-call Qarshi” МЧЖ, “F-zone” МЧЖ “Roboticware” МЧЖ каби компаниялар раҳбарлари ва мутахассислари қатнашди.

Учрашувда маҳаллий АйТи компанияларнинг экспорт салоҳиятини ошириш, глобал бозорларга чиқиш стратегияларини ишлаб чиқиш ва хорижий мижозлар билан ишлаш механизмларини такомиллаштириш масалалари муҳокама қилинди.

Шунингдек, вилоятда АйТи соҳасида бандликни ошириш, ёшларнинг рақамли кўникмаларини ривожлантириш ва уларни халқаро талаблар асосида тайёрлаш, дастурий таъминот, АйТи-стартапларни қўллаб-қувватлаш ва бошқа хизматларни халқаро миқёсда экспорт қилиш имкониятларини кенгайтириш имкониятлари кўриб чиқилди.

Шу билан бирга, халқаро АйТи компаниялари ва инвесторларга вилоятдаги АйТи экотизимининг имкониятларини таништириш, ҳамкорлик учун қулай шароитлар яратиш ва қўшма лойиҳаларни йўлга қўйиш масалаларига эътибор қаратилди.

Учрашув давомида вилоятда АйТи экотизимини янада кенгайтириш, ёшларнинг глобал технологик бозорга чиқишига кўмаклашиш, шунингдек, хорижий компаниялар билан алоқаларни кенгайтириш бўйича аниқ таклифлар илгари сурилди.