“INNOWOMENWEEK-2024” ихтирочи хотин-қизларнинг инновацион ҳафталиги доирасида Ўзбекистон Республикаси Рақамли технологиялар вазирлиги ва Ўзбекистон Республикаси Оила ва хотин-қизлар қўмитаси томонидан аёлларнинг АйТи соҳасидаги ўрни мавзусида тадбир ва Корея Ихтирочи аёллар ассоциацияси делегацияси билан учрашув ташкил этилди.

Тадбирда Ўзбекистон Республикаси Бош вазирининг ўринбосари, Оила ва хотин-қизлар қўмитаси раиси Зулайҳо Маҳкамова, Рақамли технологиялар вазири ўринбосари Рустам Каримжонов ва вазир маслаҳатчиси Камола Собирова иштирок этди. Шунингдек, Корея ихтирочи аёллар уюшмаси делегацияси ва АйТи соҳасига қизиқувчи хотин-қизлар ҳам тадбирга ташриф буюрди.

Тадбирнинг асосий мақсади — хотин-қизларни АйТи соҳасига жалб қилиш, инновация, технология, тадбиркорлик ва илм-фан соҳаларида иштирокини ошириш ва рағбатлантиришдан иборат.

Тадбир давомида АйТи соҳасида муваффақиятга эришган хотин-қизлар ўз тажрибалари билан ўртоқлашди ва тақдимот ўтказди

Бундан ташқари, Корея ихтирочи аёллар ассоциацияси делегацияси билан учрашув ташкил этилди. Учрашув давомида аёлларни қўллаб-қувватлаш, таълим олиш имкониятларини кенгайтириш ва гендер тенгликни таъминлаш масалаларига алоҳида эътибор қаратилди.

Томонлар хотин-қизларнинг АйТи соҳасидаги иштирокини ошириш ва бу йўналишда тажриба ҳамда билим алмашиш орқали ҳамкорликни кучайтиришга келишиб олдилар. Рақамли ривожланишда аёлларни фаол жалб қилиш ва уларни қўллаб-қувватлашга қаратилган лойиҳаларни биргаликда амалга ошириш режалари белгиланди.

Ушбу учрашув икки мамлакат ўртасидаги дўстлик алоқаларини янада мустаҳкамлаб, инновациялар ва янги имкониятларни яратишга туртки бўлади.