IT Park Нидерландиянинг DOMiNO Ventures венчур фонди билан англашув меморандумини имзолади.

Меморандум доирасида DOMiNO Ventures компанияси жорий йилда IT Park Uzbekistan билан ҳамкорликда Ўзбекистоннинг инновацион экотизимини ўрганиш ва унга ўз ҳисса қўшишни режалаштирмоқда.

Дунёнинг 8 мамлакатида фаолият юритувчи DOMiNO Ventures компаниясининг операцион жамоаси Туркиянинг Истанбул шаҳрида жойлашган бўлиб, 50 дан ортиқ глобал ва маҳаллий ҳамкорларга эга. Жамғармани кенгайтириш стратегияси туфайли унинг жамоаси турли тадбирларда, хусусан, Озарбайжон, Грузия, Қозоғистон ва Ўзбекистонда фаол иштирок этмоқда. Биргина сўнгги икки чорак давомида DOMiNO Ventures жамғармаси 1000 та стартапни таҳлил қилди ва кўриб чиқди, бу эса унинг истиқболли тадбиркорларни аниқлаш ва қўллаб-қувватлаш истагидан далолат беради.

Жамғарма вакиллари Ўзбекистоннинг жадал ривожланаётган технология соҳаси улкан имкониятлар яратиб, уни сармоя киритиш учун жозибадор бозорга айлантираётганини алоҳида таъкидлашди. Шунингдек, улар минтақанинг салоҳиятини эътироф этиб, 2024 йилда Ўзбекистонда 5 та технологик стартапга сармоя киритиш ва уларни фаол қўллаб-қувватлаш, халқаро бозорларга чиқиш ва глобал инновациялар саҳнасидаги ўз мавқеини мустаҳкамлашга кўмаклашиш, шунингдек, улар учун лойиҳани ривожлантириш бўйича турли дастурларни ташкил этиш режаларини эълон қилишди.

Ушбу ҳамкорлик нафақат IT Parkнинг миллий инновацион экотизимнинг асосий ўйинчиси сифатидаги мавқеини мустаҳкамлайди, балки ортиб бораётган қизиқиш ва Ўзбекистоннинг технологик ютуқлар ва инвестицион имкониятларнинг динамик маркази сифатида эътироф этилишини ҳам таъкидлайди. IT Park Uzbekistan ва DOMiNO Ventures ўртасидаги ҳамкорлик Ўзбекистонда технология соҳасининг янада ўсиши ва муваффақиятига салмоқли ҳисса қўшиш, стартаплар учун янги имкониятлар очиш ҳамда инновациялар, тадбиркорлик ва венчур молиялаштириш соҳаларида халқаро ҳамкорликни ривожлантиришга қаратилган.