Жорий йилнинг 22 апрел куни мамлакатимиздаги энг йирик уяли алоқа оператори “COSCOM” МЧЖ ҳамда Kia, CHERY, Haval, Hyundai Trucks, LADA ва Renault каби автомобил брендларининг Ўзбекистондаги расмий дистрибютори “ADM Global” компанияси ўртасида ўзаро ҳамкорлик шартномаси имзоланди.

Ушбу ҳамкорликдан кўзланган асосий мақсад “ADM Global” компаниясининг замонавий телекоммуникация инфратузилмасини шакллантириш орқали сифатли ва ишончли алоқа билан таъминлаш учун шароит яратишдир.

Келишув доирасида қўшма фаолиятнинг турли шакллари, шу жумладан, тажриба ва маълумот алмашиш, консультация олиш, тадбирлар ташкил этиш, қўшма лойиҳалар ва қарорларни амалга ошириш кўзда тутилган.

“COSCOM” МЧЖ Бош директори Андрей Шишковскийнинг айтишича, “АDM Global” компанияси бугунги кунда катта иш берувчилардан бири бўлиб, 3000 дан зиёд ходимларни иш билан таъминлаб келмоқда. “COSCOM” МЧЖ эса ушбу компаниянинг янада ривожланиши йўлида завод ходимларини сифатли алоқа билан таъминлашни мақсад қилган. Келгусида “Roodell” МЧЖ билан ҳамкорлик замонавий технологияларнинг жорий этилишига ва бизнес-жараёнлар самарадорлигини оширишга олиб келади.

Умид қиламизки, икки компаниянинг ҳамкорликдаги фаолияти Ўзбекистонда ахборот-коммуникация технологияларини ривожлантириш учун янги истиқболларни очиб беради ва “Рақамли Ўзбекистон-2030” стратегиясини амалга оширишга ёрдам беради.