Yaponiya o‘z kosmik qurilmasini Oy sirtiga yumshoq qo‘ndirishga muvaffaq bo‘ldi.

SLIM kosmik apparati yaponlarning Yer yo‘ldoshini zabt etish yo‘lidagi ikkinchi urinishi bo‘ldi. Yangi navigatsiya tizimi qo‘l keldi: apparat kichik krater qiyaligida oldindan tanlangan joyga beshikast qo‘ndi.

Oxirgi paytlarda Oyga qo‘nishga uringan qurilmalarning muvaffaqiyatsizligi, ayniqsa, qo‘nishning so‘nggi pallalaridagi omadsizliklar sabab, yapon zondi barchaning diqqat markazida turgan edi.

2023 yilning avgustida Oyga borib urilib majaqlanib ketgan “Luna-25” (Rossiya) va undan sal keyin Oyga yumshoq qo‘ngan “Chandrayan-3” (Hindiston) kosmik stansiyalariga nisbatan yapon qurilmasi kichikroq — 200 kilogramm og‘irlikka ega.

SLIM Oy modelining ishlari besh deyishga hozircha shoshilmaymiz: Kunchiqar yurt fazo agentligi xabar berishicha, qurilmaning quyosh panellarida muammo chiqibdi. Ular hozircha tok bermayapti, modul akkumulyatorda ishlamoqda.

Yaponiya Oyga kosmik apparatini qo‘ndira olgan beshinchi mamlakat bo‘ldi, shu paytgacha ro‘yxatda Sobiq Ittifoq, AQSh, Xitoy va Hindiston bor edi.