28 fevral - 4 mart kunlari «Raqamli avlod qizlari – 2022» loyihasi doirasida IT sohasining turli yo‘nalishlari bo‘yicha oromgoh tashkil etilgan. Tanlov shartlari asosida qabul qilingan qizlar loyiha davomida malakali mentorlardan ta’lim olishadi.

Aynan «Raqamli avlod qizlari – 2022» loyihasi ayol va qizlarga IT ning turli yo‘nalishlari, jumladan, mobil dasturlash, brending, SMM va PR, biznes tahlil, raqamli dizayn sohalari bo‘yicha fundamental bilim shakllantirishga va o‘z sohalari bo‘yicha tajriba orttirishga yordam beradi. Loyiha kimlar uchun qiziq?  IT sohasida o‘z kelajagini ko‘rayotgan, ammo ushbu kasb sir-sinoatlarini o‘rganishda nimalarga ahamiyat berish kerakligi bilmayotgan, o‘z faoliyatini yo‘lga qo‘yishga ikkilanayotgan opa-singillarimiz uchun ushbu loyiha ayni muddaodir.

Prezident ta’lim muassasalari agentligi va «Digital Generation Uzbekistan» NNM tomonidan tashkil etilgan ushbu loyihada 1500 ta talabgorlardan tanlab olingan 60 nafardan ziyod iqtidorli qizlar  besh kun davomida tajribali eksportlar bilan suhbatlashish, tajriba almashish, qobiliyatlarini namoyon etish va o‘z loyihalari taqdimotini o‘tkazishga muvaffaq bo‘ladilar.  

Mazkur loyihalardan ko‘zlangan maqsad, ayol-qizlarning axborot texnologiyalar sohasidagi rolini oshirish, ularning zamonaviy kasblarga yo‘naltirish hamda g‘oya va loyihalarini qo‘llab-quvvatlashdir.

Tadbirning ochilish marosimida agentlik rahbari Hilola Umarova so‘zga chiqib, yig‘ilganlarga omad tiladi: 

«So‘nggi yillarda axborot texnologiyalari sohasida ayol-qizlarning roli tobora ortib bormoqda. Bu yil “Raqamli avlod qizlari” tadbiri ikkinchi marta tashkil etildi va sizlarni bu yerda ko‘rib turganimdan xursandman. Umid qilamanki, mashg‘ulotlar davomida egallagan bilimlaringiz kelgusidagi faoliyatingizda ham o‘z samarasini beradi».

Eslatib o‘tamiz, o‘quvlar inklyuziv shaklda tashkil etilgan bo‘lib, unda eshitish zaifligiga ega va tayanch harakat tizimida nuqsoni bor yoshlar ham boshqalar bilan birgalikda ta’lim olishlari uchun barcha sharoitlar yaratilgan.

Loyiha so‘nggida o‘z yo‘nalishi bo‘yicha iqtidorli opa-singillarimiz qimmatbaho sovg‘alar bilan taqdirlanadi.