People for Successful Corean Reunification (Pscore) ташкилоти ўтказган янги тадқиқотга кўра, Шимолий Корея жамиятининг атиги бир неча минг нафар имтиёзли аъзоларигина глобал тармоқ, яъни интернетдан фойдаланмоқда. Мамлакат аҳолисининг катта қисми учун ҳатто ўта кучли цензураланган ички интранет эшиклари таппа-тақ ёпилган.

Бу мамлакатда эркин ва очиқ ахборот олиш имкониятини йўқ деса ҳам бўлади. Масалан, Pscore ҳисоботига кўра, глобал интернетга киришга рухсати бор “имтиёзлилар”га ҳам жуда қаттиқ чекловлар қўйилган. Улар интернетга кириш учун узоқ босқичли тасдиқлаш жараёнидан ўтишади, қолаверса, фойдаланувчиларнинг ёнида ҳар 5 дақиқада уларнинг хатти-ҳаракатини баҳолаб борувчи кузатувчи албатта бўлади.

Ташкилот хулоса қилишича, КХДРда яшовчи миллионлаб кишилар учун глобал тармоқ шунчаки мавжуд эмас, унинг нималигини билишмайди ҳам. 

“Бутунжаҳон ўргимчак тўрини ўрганганман, ҳатто имтиҳон учун у ҳақда маълумотларни ёдлаганман, бироқ интернет нималигини фақат назарияда билардим”, — деган шимолий кореялик қочқинлардан бири.