Biz uzoq vaqtdan beri jahon bozorida IT kasblarining rivojlanish dinamikasini kuzatmoqdamiz. Endi biz 2022 yilda, ayniqsa, dolzarb bo‘lgan mutaxassislar ro‘yxatini yaratishga qaror qildik. Ro‘yxat jahon bozorida ish haqining o‘sishi, soha mutaxassislariga bo‘lgan talab va umuman kasbning rivojlanish dinamikasidan kelib chiqib tuzilgan. Darhol aytaylik, ro‘yxat biroz katta va dastlab top to‘rtalik mutaxassislar bilan tanishtiramiz. Bu boshqa kasblar yomonroq degani emas – ular biroz sekinroq o‘sadi. Shunday ekan, boshladik!

2021-yil yanvar oyi uchun ish haqi statistikasi Glassdoor tomonidan taqdim etilgan.

Data Analyst (Ma’lumotlar tahlilchisi)

Ushbu kasb vakillari biznes bo‘yicha aniq savollarga javob beradi.

Tahlilchilarning maoshi qolganlarnikiga nisbatan kamroq. Ammo ma’lumotlar tahlilchisi uchun sohaga kirishdagi to‘siqlar nisbatan kam. Matematika, statistika va ehtimollar nazariyasi bo‘yicha chuqur bilimga ega bo‘lish shart emas – buning uchun faqat analitik vositalarini o‘zlashtirishning o‘zi kifoya.

Ushbu soha vakillariga talab IT va texnologiya bilan bog‘liq bo‘lmagan kompaniyalarda ham mavjud va bozordagi ish haqining taqsimlanishi bevosita aloqador. O‘rtacha DA bo‘sh ish o‘rinlari DSga qaraganda 2,5-3 baravar ko‘p. Shu bilan birga, Senior DA yiliga 100 000-120 000 dollar olishi mumkin. Bularning barchasi ko‘nikma va qobiliyatlar to‘plamiga bog‘liq.

Web Developer (Veb dasturchi)

Veb dasturchi 15 yildan ortiq vaqt davomida IT sohasida eng ko‘p talab qilinadigan kasblar qatorida turadi.

Sohaga kirish qiyinchilik tug‘dirmaydi, funksional lending yaratish uchun HTML/CSSni o‘rta darajada bilish kifoya. Shu sababli sohaga talabgorlar ko‘pchilikni tashkil etadi.

Shu bilan birga, bozorda nafaqat HTML/CSS yaxshi biladigan, balki AngularJS, ReactJS, VueJS freymvork bilan JavaScriptni ham yaxshi biladigan yuqori malakali mutaxassislarga talab yuqori.

Ushbu kasbning katta afzalligi shundaki, u masofadan turib ishlash va frilanserlar uchun to‘liq mos keladi. Glassdoor ma’lumotlariga ko‘ra, mustaqil veb-ishlab chiquvchining o‘rtacha maoshi ofisda to‘liq vaqt ishlaydigan mutaxassislarnikidan ham yuqori.

Information security Analyst (Axborot xavfsizligi bo‘yicha tahlilchi)

Qizig‘i shundaki, ko‘plab kompaniyalar o‘zlarining axborot xavfsizligi bo‘yicha mutaxassislarining maoshlarini oshkor etmaydilar, shuning uchun turli manbalardagi ma’lumotlar turlicha. Masalan, Careercarma ta’kidlashicha, sohadagi o‘rtacha ish haqi yiliga 100 000 dollardan oshadi. Katta mutaxassis uchun esa 115 000 dollardan yuqori.

Kasb murakkab va mutaxassislik bo‘yicha aniq bilimlarni talab qiladi, bozorda ushbu soha vakillariga nisbatan talab katta, shuning uchun ko‘plab yirik kompaniyalar universitet ma’lumotini talab qilmaydilar, butkamp (o‘quv kurslari)ni tamomlagan mutaxassislarni xotirjamlik bilan ishga yollashadi. Ular orasida Google, Amazon, Oracle, Cisco, Facebook, Microsoft bor.

Bu mutaxassislik, ayniqsa, katta moliyaviy aktivlarga ega bo‘lgan va foydalanuvchilarning katta miqdordagi shaxsiy ma’lumotlari (banklar, yirik mahsulot korporatsiyalari, ijtimoiy tarmoqlar va video xizmatlar kabi axborot loyihalari) bilan ishlaydigan kompaniyalar uchun dolzarbdir. ISAlar, jumladan, mudofaa hukumati loyihalari uchun kerak. BLSning ma’lumot berishicha, xavfsizlik bo‘yicha mutaxassislarga talab yiliga 31% ga o‘sadi.

Ta’kidlash joizki, nafaqat axborot xavfsizligi bo‘yicha muhandislarga, balki yaratilgan tizimlarni mustahkamligini sinovdan o‘tkazuvchi va ularda zaif tomonlarni topadigan pentesterlarga ham ehtiyoj tobora ortib bormoqda.

Python Developer

Bugungi kunda Python eng tez rivojlanayotgan dasturlash tillaridan biri hisoblanadi. PYPL reytingiga ko‘ra, u o‘rganish dinamikasi bo‘yicha birinchi o‘rinni egallaydi (30,44%), ikkinchi o‘rinda (16,67%) Java dan sezilarli ustunlik bilan. StackOverflow tadqiqoti Pythonni 2021-yilda eng ko‘p qo‘llanilgan dasturlash tili sifatida 4-o‘ringa qo‘ydi.

Ushbu soha dasturchilari uchun eng yuqori maosh AQShda to‘lanadi. U yerda hatto Junior  ham yiliga 90 000 dollar ishlab topishi mumkin. Middle esa hech qanday muammosiz 110 000  dollargacha maosh oladi.

Qizig‘i shundaki, Python dasturchisining maoshi doimiy ravishda o‘sib boradi. 2019–2020-yillarda u o‘rtacha 15 foizga o‘sdi va o‘sish sur’ati davom etmoqda.

Bizda hozircha shular, agar maqola sizga qiziq va foydali bo‘lsa, uni boshqalar bilan ham ulashing! Shunda biz IT sohasida eng talab yuqori bo‘lgan mutaxassislar bo‘yicha ma’lumotlar taqdim etishda davom etamiz.

Maxfuza Ro‘yiddinova