Qualcomm компанияси ўрта даражали Snapdragon 7s Gen 2 янги процессорини тақдим этди. У Snapdragon 7 Gen 2 процессорининг яхшиланган талқини бўлиб, навбатдаги Redmi смартфонларидан бирида дебют қилади.

Qualcomm Snapdragon 7s Gen 2 процессори 4 нанометрли техножараёнда ишлаб чиқарилган бўлиб, 2,4 ГГц частотали 4 та ишлаб чиқариш ядроси, 1,95 ГГц частотали 4 та энергия тежамкор ядрога эга. График нимтизим вазифасини Adreno 710 бажаради.

Ушбу процессор янгиланиш частотаси 144 Гц бўлган экранларни, 200 Мп гача бўлган камераларни, 3200 МГц частотали  LPDDR5 тоифали оператив хотираларни ҳамда UFS 4.0 сақлагичларни қўллаб-қувватлайди. Ўрнатилган Snapdragon X62 5G модеми мобил тармоқлар орқали 2,9 Гбит/сониягача тезликда маълумот узатишни таъминлайди. Симсиз интерфейслардан Wi-Fi 6E ва Bluetooth 5.2 билан ишлайди. Асосий йўлдошли навигация тизимлари, жумладан QZSS, Galileo, BeiDou, NavIC, ГЛОНАСС ва GPS (L1 + L5)га мослаштирилган.

Snapdragon 7s Gen 2 ўрнатилган илк смартфон Redmi Note 13 Pro бўлади. Хусусиятларидан кўриниб турибдики, процессор айнан ушбу моделга мослаб ишлаб чиқилган. Redmi Note 13 Pro+ смартфони эса яна бир янги процессор — Dimensity 7200 Ultra (MediaTek) билан таъминланади. Бу смартфонлар 21 сентябр куни тақдим этилиши кутиляпти.