Рақамли технологиялар вазири Шерзод Шерматов Қарши шаҳрида жойлашган “FATHTIME” МЧЖ компаниясига ташриф буюрди. 

Ушбу компания жорий йилнинг 31 январида рўйхатдан ўтиб, IT Park резиденти мақомини қўлга киритган. “FATHTIME” МЧЖ қисқа вақт ичида самарали фаолият олиб бориб, 25 та янги иш ўрни яратишга эришди. Компания АҚШнинг 100 дан ортиқ компаниялари билан ҳамкорлик қилиб, уларга логистика, алоқа тармоқлари ва аутсорсинг хизматларини кўрсатиб келмоқда.

Ташриф давомида вазир компания раҳбарияти билан суҳбатлашиб, уларнинг фаолияти, келажакдаги режалари ва АйТи хизматларини кенгайтириш масалаларини муҳокама қилди. 

“FATHTIME” МЧЖ ҳозирги кунда Business Process Outsourcing (BPO) ва IT Solutions соҳаларида хизмат кўрсатиб, ўзини халқаро бозорда фаол экспорт қилувчи компания сифатида танитмоқда.

Компаниянинг асосий фаолияти АҚШ бозорига йўналтирилган бўлиб, ҳозиргача кўрсатилган хизматларнинг қиймати 500 минг АҚШ долларини ташкил этди.

Компания ўз ходимлари сонини 100 дан ортиқ кўрсаткичга етказишни ва экспорт ҳажмини 1 млн АҚШ долларига оширишни режалаштирмоқда. Ушбу компания вилоятнинг рақамли иқтисодиётда ўз ўрнини мустаҳкамлаб, АйТи ва логистика йўналишида муҳим корхоналардан бирига айланмоқда.

Вазир компаниянинг келажак режалари ҳақида суҳбатлашиб, уларнинг келгусидаги мақсадларига эришишда зарур маслаҳат ва тавсияларини берди. Жумладан, “FATHTIME” компаниясининг халқаро бозорда рақобатбардошлигини ошириш, технологик инфратузилмани ривожлантириш ҳамда ходимларни малакасини ошириш бўйича бир қатор таклифлар кўриб чиқилди.