Хитойнинг Гуанчжоу миллий суперкомпютер маркази мутахассислари жаҳондаги энг кучли суперкомпютерни ишга туширишгани таъкидланмоқда. Қизиғи, янги Tianhe Xingyi суперкомпютерида Intel, AMD ёки NVIDIA сингари номдор брендларнинг эмас, балки маҳаллий ишлаб чиқарувчининг нотаниш процессорлари ўрнатилган.

Tianhe Xingyi даставвал 2019 йилда Tianhe-3 номи остида ишга туширилиши керак эди, бироқ кейинчалик лойиҳани жиддий ўзгартиришган кўринади. Мавжуд маълумотга кўра, суперкомпютер Хитойнинг икки ядроли FeiTeng MT3000 ARM-процессорлари базасида қурилган. Тизимда қанча чип ишлатилгани очиқланмади, бироқ унинг юқори ишлаш қуввати 1,7 экзафлопсга етиши айтилган. Солиштириш учун: глобал суперкомпютерлар расмий рейтинги етакчиси Frontier 1,194 экзафлопс кучга эга.

Хитой жаҳоннинг энг кучли суперкомпютерлари рейтинги (топ-500)да қатнашишни ва ўз компютерлари тафсилотларини тўлиқ очиқлашни бас қилгани инобатга олинса, Tianhe Xingyi тезлиги аслида қанчалигини фақат тахмин қилиш мумкин. Айрим экспертлар Хитой суперкомпютери марказий процессори (CPU)нинг энергия тежамкорлигига шубҳа билдиришяпти.