Benchmark Mineral Intelligence маълумотларига кўра, литий-ионли аккумулятор батареялари таннархи август ойида 10 фоизга ёки 1 кВт/соат учун $98,2 гача арзонлашди. Бу эса амалда электромобиллар нархи тез орада ички ёнув двигателли (бензинли) автомобиллар нархи билан деярли тенглашишини англатади.

Батареяларнинг нархи бу даражада пасайиши икки йил давомида биринчи марта кузатилди.

Маълумки, электромобиллар қийматининг 40 фоизигача бўлган қисми айнан аккумуляторларга тўғри келади. Шу боисдан аккумуляторлар учун хом ашё нархларининг электромобиллар нархларига таъсири катта.

Benchmark Mineral Intelligence таҳлилчилари ҳисоб-китобларига кўра, 1 кВт/соат электр энергиясини сақлаш 100 доллардан ошмаган тақдирда, автомобилсозлар нафақат бензинли двигателли машиналар билан нархи тенг электромобиллар чиқаришлари, балки улар билан бир хил фойда олишлари мумкин бўладики, бу электромобиллар бизнеси, умуман, соҳанинг ривожи учун муҳимдир.

Ўн йил аввал электромобиллар батареяларининг ўртача нархи 1 кВт/соат учун $668 эди. 2022 йилнинг март ойида кўрсаткич $146,4 гача тушди, жорий йилнинг августида эса, юқорида кўрсатилган қиймат ($98,2) шаклланди. TrendForce таҳлилчилари ушбу бозордаги нархлар пасайиши камида 2023 йилнинг охиригача сақланиб қолади, дейишмоқда.