«IT Women» лойиҳамизнинг бугунги қаҳрамони – фрилансер Мунира Бекмуратова. У халқаро Top Tal компаниясида ишлайди. Икки йил ичида «junior» даражасидан «senior», яъни юқори тоифали дастурчи-муҳандис даражасига эриша олган. Ҳозирда Top Tal компаниясида фрилансерлик ортидан 8 минг долларгача даромад топиш мумкинлигини таъкидлайди.

Дастлаб Тошкентдаги Westminster университетида таҳсил олиб, кейинчалик ушбу олийгоҳда ўқитувчи сифатида ишлаган фрилансеримиз халқаро «The rolling scopes school» дастури орқали IT соҳасига кириб келади ва 2017 йилдан IT соҳаси билан қатъий шуғуллана бошлайди.

– Дастлаб IT йўналишида ишламаган экансиз, ушбу соҳага кириб келишингиз қандай бўлган?

– Westminster университетида ишлаб юрган вақтимда Швецияда магистратурада ҳам ўқиб келдим. Айнан шу даврда жуда кўплаб IT тадбиркорлар билан танишганман ва улар ўз навбатида ҳам раҳбар, ҳам дастурчи эдилар, яъни кодларни яхши тушунишарди. Шунда билдимки, стартап лойиҳаларимда муваффақиятга эришиш учун «coding»ни яхши тушунишим керак экан. Шу сабабли 2017 йилда барча лойиҳаларимни тугатиб, ITни мукаммалроқ ўрганишга қарор қилдим. Икки йил мустақил ўрганишга ҳаракат қилдим ва муваффақиятсизликка учрадим. 2019 йилда эса «The rolling scopes school»нинг Ўзбекистон учун мўлжалланган дастурида ўқишни бошладим, уни тамомлагач мени Epam Systems компаниясига ишга таклиф қилишди.

– Аёллар учун IT соҳаси жуда қийин деган фикр тўғрими?

– Нега бундай фикрлашади биласизми? Чунки эркаклар болаликдан компьютер ўйинларини ўйнаб катта бўлишади ва уларнинг технология билан боғлиқлиги кўпроқ, қизларда эса акси. Агар болаликдан технология билан боғлиқлик кам бўлса, кейинчалик бу бироз қийин бўлиши мумкин. Шунингдек, кўп ота-оналар қиз болаларни шахматга беришмайди, бу албатта шахсий фикрим. Шахмат эса мантиқий фикрлаш ва кейинчалик ITга меҳр қўйиш учун керак. Шу билан бирга, ота-оналарга мурожаат қилмоқчиман, таълим ва тарбия болаликдан бошланади, шунинг учун фарзандингизга ишонинг. Уларни молиявий қўллаб-қувватлай олмасангиз ҳам, ҳеч бўлмаса сўзлар билан рағбатлантиринг. Ота-она ишончи фарзанд учун жуда муҳимдир!

– Фрилансерлик фаолиятини танлаш учун бешта сабаб...

– Биринчидан бу – «remote work», яъни дунёнинг ҳар қандай бурчагидан ишласа бўлади, иккинчиси, агар яхши компанияда ишласангиз, яхши маош кафотлатланади, Top Talдан келиб чиқадиган бўлсам, ойига 5 мингдан 8 минггача топиш мумкин. Учинчиси – хоҳлаган вақтимда ишлайман, ҳеч ким бунча соат ишлайсан, деб мажбурлай олмайди ёки ариза сўрамайди. Яна бир афзаллиги, Top Talдан келиб чиқадиган бўлсам, компания Ўзбекистонда ўтказиладиган оммавий тадбирларни қўллаб-қувватлайди ва ҳамкорлик яхши йўлга қўйилган. Бешинчи афзаллиги бу – ўзаро ишонч. Ҳеч ким мендан бугун нима иш қилдинг, деб ҳисобот сўрамайди. Ҳаммани фақат натижа қизиқтиради.

– Aйнан фрилансер бўлиб ишлаш учун қандай хусусиятларни ўзида шакллантириш керак?

– Мен ҳар доим бир маслаҳатни бераман, агар халқаро компанияларда фрилансер сифатида ишлаш ниятингиз бўлса, бироз шошилманг. Дастлаб, маҳаллий лойиҳалар билан малакангизни оширганингиз ва тажриба тўплаганингиз маъқул, негаки, фрилансер сифатида ишлашни бошлаганингиздан кейин ҳеч ким ҳеч нарсани ўргатмайди ва хатойигингизни айтмайди. Бу эса ўз устингизда ишлашга халақит беради.

– Фрилансер сифатида иш бошлаганингизда нималар ўзгарди?

– Ўзимни анча эркин ҳис қиламан, чунки биламан, мени ҳеч ким ишлаш ёки ишламасликка мажбур қила олмайди. Айнан шу жиҳати билан фрилансерлик фаолияти менга жуда ёқади.

– Ушбу йўналишни юртимизда ривожлантириш учун нималар қилиш керак, деб ўйлайсиз?

– Менимча, фрилансерликни ривожлантириш учун шу ҳақда кўпроқ гапириш керак ва шундай бўлаяпти ҳам. Бу ҳақда мингта одам эшитиб, ҳеч бўлмаганда беш киши қизиқиш билдирса ва ўрганса бу жудда катта ютуқдир. Мени ўзимдан ҳам жуда кўпчилик ушбу соҳага қизиқиб маълумот сўрашади, улар орасида аёлларнинг борлиги мени айниқса қувонтиради.

– IT сиз учун...

– IT мен учун фикрлаш, ўз қўлим билан нимадир ярата олиш ва, албатта, молиявий мустақилликдир.

Маҳфуза РЎЙИДДИНОВА