Рашк нималарга олиб келмайди дейсиз. Ҳатто турмуш қурмаган ёшлар орасидаги ассосиз рашк оқибати яхшилик билан тугамайди. Аввало, инсон севган кишисига тўлақонли ишонса, ҳеч қандай шубҳа-гумонларга асос қолмайди. Аммо рашкнинг ҳаддан зиёди сиз кўз қорачиғидек асраб, ҳаммадан қизғонган кишингизни бутун оламга овоза қилиши ҳам ҳеч гап эмас! Масалан, айнан шу рашк туфайли 19 ёшли қизнинг севган йигити Apple АirTag геотеги орқали 6 ой давомида ўзига сездирмай кузатиб юргани ҳам бугун интернет саҳифаларининг асосий янгиликларидан бирига айланди.

Биламизки, АirTag қурилмаси одамларга калит, ҳамён ва бошқа буюмларини топишга ёрдам бериш учун мўлжалланган. Аммо унинг жойлашувни аниқлаш имконияти қурилмадан нотўғри мақсадларда фойдаланишларига ҳам олиб келмоқда. Афсуски, хотин-қизларнинг таъқиб қилиниши ҳам ана шундай ҳолатлардан биридир.

Австралиянинг Мельбурн шаҳрида яшовчи Рейчел ҳам Apple АirTag геотеги орқали таъқиблар қурбонига айланди. Ачинарлиси эса бегона эмас, ўзининг севган йигити бу кузатувни амалга оширган.

Қизнинг сўзларига кўра, машинада бўлган вақтлари яқин-атрофда уни кузатувчи қурилма борлиги ҳақида мобил телефонига хабарлар кела бошлаган. Бироқ у гаджетни топа олмайди. Шундан сўнг, Рейчел яқин орада машинада ундан ташқари, фақат унинг йигити бўлганини эслайди. Бу ҳақда унинг ўзидан сўраганида йигити бу гапларни инкор этади, аммо қиз воқеа ҳақида полицияга хабар бериши ҳақига огоҳлантирганидагина йигит уни кузатиб юрганини тан олди.

Машинасининг ғилдирагига АirTag яширилганини кўрган қиз ўзини гўё ҳақоратлангандек ҳис қилади. Боиси жуда ишонган кишиси унга нисбатан бундай ишни қила олиши хаёлига ҳам келмаган эди...