UZTELECOM Тошкент Марказий темир йўл вокзалида автоматлаштирилган SIM-карта сотиш қурилмаси – SIM-коматни ишга туширди. Бу янгилик мобил алоқага уланиш жараёнини соддалаштиришда муҳим қадам бўлиб, пойтахт меҳмонлари ва фуқароларга SIM-карталарни оператор офисига ташриф буюрмасдан тез ва қулай олиш имконини беради.

SIM-комат – бу автоматик ўз-ўзига хизмат кўрсатиш қурилмаси бўлиб, фойдаланувчиларга SIM-картани олиш ва рақамни бир неча дақиқа ичида фаоллаштириш имконини беради. 

SIM-коматнинг ишга туширилиши вокзалнинг кенг кўламли реконструкцияси якунланиши билан бир вақтда амалга оширилди. Бу ўз ўрнида вокзал қулайликларини оширишга хизмат қилади. UZTELECOM томонидан ўрнатилган SIM-комат саёҳатчиларнинг мушкулини енгиллаштирувчи янги технология. Энди меҳмонларимиз вокзалнинг ўзида SIM-карталарни ортиқча оворагарчиликларсиз олишлари мумкин, бундан саёҳатчилар ҳам мамнун бўлишига шубҳамиз йўқ.

Янги SIM-комат Тошкент Марказий темир йўл вокзалининг қулай ҳудудида жойлашган. Фойдаланувчилар ускуна ёрдамида экрандаги содда кўрсатмаларга амал қилиб SIM-карта олишлари ва фаоллаштиришлари мумкин. Яқин келажакда UZTELECOM бундай қурилмалар сонини бутун Ўзбекистон бўйлаб кўпайтиришни режалаштирмоқда, бу мамлакат фуқаролари ва меҳмонлари учун мобил алоқага уланишни янада қулайлаштиради.